កិច្ចប្រជុំពិភាក្សាពិគ្រោះយោបល់លើកទី២ របស់ក្រុមការងារបច្ចេកទេសលើកកម្ពស់សុវត្ថិភាពចរាចរណ៍នៅតំបន់សាលារៀន ទីស្តីការក្រសួង៖ នាថ្ងៃចន្ទ ទី៦ ខែតុលា ឆ្នាំ២០២៥ លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ.) បានអញ្ជើញដឹកនាំកិច្ចប្រជុំពិភាក្សាពិគ្រោះយោបល់លើកទី២ របស់ក្រុមការងារបច្ចេកទេសលើកកម្ពស់សុវត្ថិភាពចរាចរណ៍នៅតំបន់សាលារៀន (Working Group on Safe School Zones Interventions -WG-SSZI) ដោយមានការអញ្ជើញចូលរួមពីថ្នាក់ដឹកនាំក្រសួង តំណាងក្រសួងអប់រំ យុវជន និងកីឡា ក្រសួងអភិវឌ្ឍន៍ជនបទ ស្នងការដ្ឋាននគរបាលជាតិ ទីភ្នាក់ងារសហប្រតិបត្តិការអន្តរជាតិជប៉ុន(JICA) API និង UNICEF ប្រចាំនៅកម្ពុជា សមាជិក សមាជិកាក្រុមការងារ WG-SSZI ដៃគូពាក់ព័ន្ធ ព្រមទាំងមន្រ្តីជំនាញមកពីអង្គភាពក្រោមឱវាទក្រសួងជាច្រើនរូបផងដែរ។ កិច្ចប្រជុំនេះ បានប្រព្រឹត្តទៅតាមរបៀបវារៈកម្មវិធីចំនួន៤សំខាន់ៗ រួមមាន៖ ១).ប្រកាសសេចក្តីសម្រេចស្តីពីការបង្កើតក្រុមការងារបច្ចេកទេសលើកកម្ពស់សុវត្ថិភាពចរាចរណ៍ ផ្លូវគោកនៅតំបន់សាលារៀន ២).កំណត់ដៃគូសំខាន់ៗដែលគួរអញ្ជើញឱ្យចូលរួមក្នុងក្រុមការងារបន្ថែមទៀត ៣.ចែករំលែក និងសម្របសម្រួលក្នុងចំណោមដៃគូពាក់ព័ន្ធតាមរយៈការពិនិត្យលើសកម្មភាពបច្ចុប្បន្ន និងផែនការសកម្មភាពនៃតំបន់សុវត្ថិភាពសាលារៀន កំណត់បញ្ហាប្រឈមរួម និងពិភាក្សាអំពីការគាំទ្រ របស់ គ.ស.ច.គ. និងដៃគូ លើចំណុចដែលអាចចូលរួមបាន និង ៤).កំណត់យុទ្ធសាស្ត្រអាទិភាព និងកំណត់ជំហានបន្ទាប់សម្រាប់ឆ្នាំ២០២៥-២០២៦ រួមទាំងការលើកឡើងអំពីសកម្មភាពរបស់ WG-SSZI ការបង្កើតអនុក្រុមការងារ និងយន្តការដើម្បីគាំទ្រការប្តេជ្ញាចិត្តក្នុងការលើកកម្ពស់សុវត្ថិភាពចរាចរណ៍ផ្លូវគោកនៅប្រទេសកម្ពុជា។ ថ្លែងនៅក្នុងកិច្ចប្រជុំ លោកជំទាវប្រធានអង្គប្រជុំ បានសម្តែងនូវការកោតសរសើរ និងវាយតម្លៃខ្ពស់ចំពោះការយកចិត្តទុកដាក់ និងកិច្ចខិតខំប្រឹងប្រែងរបស់ថ្នាក់ដឹកនាំក្រសួង និងស្ថាប័នពាក់ព័ន្ធ និងសមាជិក សមាជិកាក្រុមការងារ WG-SSZI ក្រសួងស្ថាប័ន ដៃគូ និងមន្រ្តីជំនាញពាក់ព័ន្ធ ក្នុងការចូលរួមរៀបចំការងារបច្ចេកទេសលើកកម្ពស់សុវត្ថិភាពចរាចរណ៍នៅតំបន់សាលារៀនដ៏មានសារៈសំខាន់ក៏ដូចជា ផ្ដល់នូវធាតុចូលបន្ថែមដែលជាយន្តការសំខាន់ក្នុងការជួយជំរុញ និងរួមចំណែកដោះស្រាយបញ្ហាប្រឈមនានា ដើម្បីធានាបាននូវសុវត្ថិភាពការធ្វើដំណើររបស់សិស្សានុសិស្សនៅតាមសាលារៀននៅកម្ពុជា សំដៅកាត់បន្ថយគ្រោះថ្នាក់ចរាចរណ៍នៅក្នុងប្រទេសកម្ពុជាឱ្យមានកម្រិតទាប៕