ក្រសួងសាធារណការ និងដឹកជញ្ជូន នឹងបន្តបើកឱ្យពលរដ្ឋឆ្លងកាត់ស្ពានមិត្តភាពកម្ពុជា-ចិន មេគង្គក្រចេះ រហូតថ្ងៃទី១ តុលានេះ។ ការបន្តបើកឱ្យឆ្លងកាត់នេះ ដោយសារទឹកទន្លេបន្តហក់ឡើង និងដើម្បីជួយសម្រួលដល់ការធ្វើដំណើររបស់ប្រជាពលរដ្ឋ។-- ស្ពានមិត្តភាពកម្ពុជា-ចិន មេគង្គក្រចេះ ដែលបានបើកឱ្យឆ្លងកាត់បណ្ដោះអាសន្នក្នុងរដូវភ្ជុំបិណ្ឌ នឹងបន្តបើករហូតដល់ថ្ងៃទី១ ខែតុលា។ បើតាមក្រសួងសាធារណការ និងដឹកជញ្ជូន ក្រោយថ្ងៃទី១ ខែតុលា ក្រុមការងារការដ្ឋានស្ថាបនាស្ពាន នឹងបិទចរាចរណ៍ ដើម្បីបន្តការងារចុងក្រោយដូចជា៖ ការងារស៊ុតកៅស៊ូAC,ការងារគូសគំនូសចរាចរណ៍, ការងារដំឡើងផ្លាកសញ្ញាចរាចរណ៍ និងការងារភ្លើងបំភ្លឺស្ពានជាដើម។ រហូតមកទល់ពេលនេះ ស្ពានមិត្តភាពកម្ពុជា-ចិន មេគង្គក្រចេះ បានសម្រេចការសាងសង់ស្ទើរ១០០ភាគរយ ខណៈគម្រោងទាំងមូលមាន គម្រោងសាងសង់ស្ពានមិត្តភាពកម្ពុជា-ចិន មេគង្គក្រចេះ និងផ្លូវតភ្ជាប់សម្រេចបាន៨៧,២៥ភាគរយហើយ។ ស្ពាននេះ មានទីតាំងត្រើយខាងកើតស្ថិតនៅត្រង់ភូមិតាលុស ឃុំបុសលាវ ស្រុកចិត្របុរី និងត្រើយខាងលិច ស្ថិតនៅត្រង់ភូមិថ្មរាប ឃុំព្រែកប្រសព្វ ស្រុកព្រែកប្រសព្វ ខេត្តក្រចេះ៕