ទស្សនកិច្ចសិក្សា និងកិច្ចប្រជុំពិភាក្សាអំពីកិច្ចសហប្រតិបត្តិការលើការរៀបចំកម្មវិធីបណ្ដុះបណ្ដាលនិងផ្លាស់ប្ដូរបទពិសោធន៍ ជាមួយសាកលវិទ្យាល័យ Chongqing Jiaotong University នៅទីក្រុងឆុងឈីង សាធារណរដ្ឋប្រជាមានិតចិន៖ ថ្ងៃទី ១៦ ខែកញ្ញាឆ្នាំ២០២៥ ឯកឧត្តម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ នៃក្រសួងសាធារណការនិងដឹកជញ្ជូន និងក្រុមការងារ បានទៅបំពេញទស្សនកិច្ចសិក្សានៅសាកលវិទ្យាល័យ Chongqing Jiaotong University ដើម្បីផ្សារភ្ជាប់ទំនាក់ទំនងនិងកិច្ចសហប្រតិបត្តិការជាមួយថ្នាក់ដឹកនាំនៃសាកលវិទ្យាល័យ និងបានពិភាក្សាអំពីកិច្ចសហប្រតិបត្តិការ រវាងសាកលវិទ្យាល័យ និងក្រសួងសាធារណការនិងដឹកជញ្ជូន ជាពិសេសការរៀបចំកម្មវិធីបណ្ដុះបណ្ដាលពង្រឹងសមត្ថភាព និងផ្លាស់ប្ដូរបទពិសោធន៍នៃការអនុវត្តជាក់ស្ដែង សំដៅផ្ដល់ចំណេះដឹងនិងបទពិសោធន៍បន្ថែមទៀតដល់មន្ត្រីរាជការនៃក្រសួងសាធារណការ និងដឹកជញ្ជូន។ ជាលទ្ធផលនៃកិច្ចប្រជុំពិភាក្សាផ្ទាល់ ថ្នាក់ដឹកនាំនៃសាកលវិទ្យាល័យដឹកនាំដោយលោកសាស្ត្រាចារ្យ Luo Jun សាកលវិទ្យាធិការរង និងប្រតិភូក្រសួង បានឯកភាពលើកិច្ចសហការរៀបចំវគ្គបណ្តុះបណ្តាលខ្លីចំនួន២វគ្គ ដល់មន្រ្តីរាជការក្រសួងសាធារណការនិងដឹកជញ្ជូនចំនួន៦០នាក់ នៅក្នុងអំឡុងខែតុលា និងខែវិច្ឆិកា ឆ្នាំ ២០២៥ ខាងមុខនេះ នៅទីក្រុងឆុងឈីង ដែលផ្តោតលើជំនាញពាក់ព័ន្ធនឹងការអភិវឌ្ឍប្រព័ន្ធដឹកជញ្ជូនតាមផ្លូវទឹក ការគ្រប់គ្រងចរាចរណ៍នៃការដឹកជញ្ជូនតាមផ្លូវគោក ផ្លូវដែក ឡូជីស្ទីក និងការអភិវឌ្ឍហេដ្ឋារចនាសម្ព័ន្ធផ្លូវ ស្ពាន ដោយការចំណាយនឹងត្រូវរ៉ាប់រងដោយភាគីចិន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube