ភ្នំពេញ៖ គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥ភាគរយហើយ ដែលនឹងបញ្ចប់នៅដើមឆ្នាំ២០២៨។ នេះបើតាមក្រសួងសាធារណការ និងដឹកជញ្ជូន។ក្រសួងសាធារណការ អះអាងថា គម្រោងស្ពានឆ្លងកាត់ទន្លេបាសាក់ នឹងជួយកាត់បន្ថយការកកស្ទះចរាចរណ៍លើស្ពានព្រះមុនីវង្ស ភ្ជាប់ផ្លូវជាតិលេខ១ នៅខណ្ឌច្បារអំពៅ និងជួយពង្រឹងដល់ទំនាក់ទំនងសេដ្ឋកិច្ចសង្គម រវាងរាជធានីភ្នំពេញប៉ែកខាងត្បូង ព្រលានយន្តហោះអន្តរជាតិតេជោក្រុងតាខ្មៅ។ លើសពីនេះ ស្ពាននេះ នឹងធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់រាជធានីភ្នំពេញ កាត់បន្ថយការកកស្ទះចរាចរណ៍នៅតាមដងទន្លេបាសាក់ និងជួយពន្លឿនការអភិវឌ្ឍក្នុងតំបន់។ក្នុងដំណើរចុះពិនិត្យវឌ្ឍនភាពគម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ នៅថ្ងៃទី១១ ខែកញ្ញា លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានវាយតម្លៃខ្ពង់ចំពោះក្រុមហ៊ុនសំណង់ដែលកំពុងអនុវត្តគម្រោង ដោយគោរពតាមបទដ្ឋានបច្ចេកទេស និងកិច្ចសន្យាបច្ចេកទេស ប្រកបដោយគុណភាព និងសោភ័ណភាព។ លោករដ្ឋមន្ត្រី បានស្នើដល់អង្គភាព និងស្ថាប័នពាក់ព័ន្ធ ខិតខំសម្របសម្រួល ដោះស្រាយ និងកាត់បន្ថយផលប៉ះពាល់ជាមួយប្រជាពលរដ្ឋ ដើម្បីជំរុញឲ្យគម្រោងផ្លូវតភ្ជាប់អាចដំណើរការ និងបញ្ចប់។ ជាមួយគ្នានេះ លោក ប៉េង ពោធិ៍នា ជំរុញការងារសាងសង់ផ្លូវតភ្ជាប់ទៅផ្លូវជាតិលេខ១ និងបន្តពង្រឹងសុវត្ថិភាពការងារបន្តទៀត។សូមបញ្ជាក់ ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) ជាស្ពានទី៧តាមដងទន្លេបាសាក់ បន្ទាប់ពីស្ពានដែលបានសាងសង់រួចទាំង៦ រួមមាន ស្ពានឆ្លងកោះពេជ្រកោះនរា ស្ពានព្រះមុនីវង្សទាំង២ ស្ពានសំរោង ស្ពានកោះអន្លង់ចិន និងស្ពានកោះធំ។ គម្រោងសាងសង់ស្ពានឆ្លងកាត់ទន្លេបាសាក់ (ព្រែកប្រា-ចាក់អង្រែក្រោម) ស្ថិតក្នុងភូមិសាស្ត្រ ខាងលិច សង្កាត់ចាក់អង្រែក្រោម ខណ្ឌមានជ័យ និងត្រើយខាងកើត ខណ្ឌច្បារអំពៅ រាជធានីភ្នំពេញ៕