កំពង់ចាម ៖ ដើមឈើផ្កា ប្រភេទ ជើងគោ ចំនួន១៥០០០ដើម នឹងត្រូវបានរៀបចំដាំនៅតាមបណ្ដោយផ្លូវជាតិលេខ៧ ចំនួន៤គន្លងចាប់ពីរង្វង់មូលស្គន់ ស្រុកជើងព្រៃ រហូតដល់រង្វង់មូល ស្ពានគីហ្សូណា ក្រុងកំពង់ចាម ខេត្តកំពង់ចាម ។ នេះបើតាមការបញ្ជាក់នៅក្នុងសេចក្ដីប្រកាសព័ត៌មានរបស់ក្រសួងសាធារណការនិងដឹកជញ្ជូន កាលពីថ្ងៃទី០៤ កញ្ញា ២០២៥ ។គួររម្លឹកថា ដើមឈើផ្កាទាំង១៥០០០ដើម ជាអំណោយរបស់លោកសាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ តាមរយៈការស្នើសុំពី សំណាក់លោកអ៊ុន ចាន់ដា អភិបាលខេត្តកំពង់ចាម ។ នៅក្នុងកិច្ចប្រជុំពិនិត្យវឌ្ឍនភាពការងារស្ថាបនាផ្លូវជាតិលេខ៧ និងរៀបចំប្រព័ន្ធសុវត្ថិភាព កាលពីថ្ងៃទី ០៤ កញ្ញា ២០២៥ លោកអ៊ុន ចាន់ដា អភិបាលខេត្តកំពង់ចាម បានមានប្រសាសន៍ថា គម្រោងដាក់ដាំដើមឈើផ្កា យ៉ាងច្រើនដែលមិនធ្លាប់មានពីមុនមកនេះ គឺទទួលបានការឯកភាពទាំងស្រុង ពីក្រសួងពាក់ព័ន្ធរួមមានក្រសួងសាធារណការ និងដឹកជញ្ជូន និងក្រសួងបរិស្ថាន ។ លោកអភិបាលខេត្ត លើកឡើងថា ជាមួយគ្នានេះសូមប្រជាពលរដ្ឋ ត្រូវសហការចូលរួម ថែរក្សា ការពារ គឺ «មនុស្ស១គ្រួសារ ថែរក្សាដើមឈើផ្កា១ដើម»។ សំដៅធ្វើយ៉ាងណាឲ្យការធ្វើចរាចរណ៍តាមដងផ្លូវនេះមានសុវត្ថិភាពខ្ពស់ និងបង្កើនសោភ័ណភាពបរិស្ថានតាមដងផ្លូវ។ ក្នុងឱកាសនោះដែរ លោក លឹម ស៊ីដេនីន រដ្ឋលេខាធិការ និងជាប្រធានគម្រោងសាងសង់ផ្លូវជាតិលេខ៧ បានថ្លែងកោតសរសើរដល់រដ្ឋបាលខេត្តកំពង់ចាម ដែលបានពុះពារសហការជាមួយក្រសួងពាក់ព័ន្ធ ជំរុញឲ្យការស្ថាបនាផ្លូវជាតិលេខ៧ ទទួលបានជោគជ័យ គួរជាទីមោទន ដែលគិតមកដល់ពេលនេះ ការដ្ឋានសាងសង់ផ្លូវជាតិលេខ៧ សម្រេចបានប្រមាណជាង ៧០%ហើយ ៕