សម្រស់ឃុំដាក់ដាំ ដែលអ្នកគ្រប់គ្នាមិនគួរមើលរំលង! ឃុំដាក់ដាំ ជាឃុំមួយក្នុងចំណោមឃុំទាំងពីរ ក្នុងស្រុកអូររាំង ខេត្តមណ្ឌលគិរី។ ឃុំនេះមានចម្ងាយផ្លូវពីទីរួមខេត្ត ប្រវែង១៨គីឡូម៉ែត្រ មានផ្ទៃដីសរុប ៤២ ៣៩៨ ហិចតា ស្ថិតនៅតំបន់ខ្ពងរាប។ ឃុំដាក់ដាំ មាន៣ភូមិ រួមមាន៖ ភូមិពូត្រែង ភូមិឡេះ ភូមិពូឆប មានប្រជាពលរដ្ឋសរុបចំនួន ២៤៦៤ នាក់ ក្នុងនោះមានជនជាតិដើមភាគតិចចំនួនពូនង (ព្នង) ៧៥%។ ជនជាតិដើមភាគតិចពូនង ឃុំដាក់ដាំ គឺនៅប្រកាន់របៀបរស់នៅបែបប្រពៃណីច្រើន ដូចជាជំនឿ វប្បធម៌ប្រពៃណី ការធ្វើចម្ការ ហើយឃុំនេះក៏មានតំបន់ទេសចរណ៍ជាច្រើនផងដែរដូចជា ទឹកជ្រោះជ្រៃធំ ភ្នំអណ្តូងស្នេហ៍ ទឹកជ្រោះ៧ជាន់ បឹងស្នេហ៍ វាលស្មៅដ៏ស្រស់ស្អាតក្នុងឃុំនេះផងដែរ។ តំបន់នេះក៏នឹងផ្តល់នូវការយល់ដឹងអំពីរបៀបរស់នៅរបស់ជនជាតិដើមភាគតិចពូនង ព្រមទាំងផ្តល់នូវបទពិសោធន៍ក្នុងការស្នាក់នៅតាមផ្ទះក្នុងសហគមន៍ សម្រាប់អ្នកដែលមានបំណងចង់ស្វែងរកការយល់ដឹងពិតប្រាកដក្នុងការរស់នៅ វប្បធម៌ប្រពៃណី ម្ហូបអាហារ របស់ជនជាតិដើមភាគតិចក្នុងតំបន់នេះផងដែរ។ បងប្អូនអាចចូលរួមក្នុងសកម្មភាពប្រពៃណីដូចជាការធ្វើស្រែចម្ការ ធ្វើម្ហូបអាហារសិប្បកម្មប្ញស្សី តម្បាញផ្សេងៗជាច្រើនទៀត៕ ប្រភពពី៖ Tong Len - តូង លេន