កំពង់ចាម៖ ដើមឈើផ្កា ប្រភេទ “ជើងគោ” ចំនួន ១៥.០០០ដើម នឹងដាំនៅតាមបណ្តោយផ្លូវ ជាតិលេខ៧ មានចំនួន ៤គន្លង ចាប់ពីរង្វង់មូលស្គន់ ស្រុកជើងព្រៃ រហូតដល់ រង្វង់មូល ស្ពានគីហ្សូណា ក្រុងកំពង់ចាម នាពេលខាងមុខនេះ។ ដើមឈើផ្កាខាងលើ ជាអំណោយរបស់ លោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែននគរូបនីយកម្ម និងសំណង់ តាមរយៈការស្នើសុំពី លោក អ៊ុន ចាន់ដា អភិបាលខេត្តកំពង់ចាម។ នេះបើតាមការបញ្ជាក់លោក អ៊ុន ចាន់ដា អភិបាល នៃគណៈអភិបាលខេត្ត នៅក្នុងកិច្ចប្រជុំពិនិត្យវឌ្ឍនភាព ការងារស្ថាបនាផ្លូវជាតិលេខ៧ និងរៀបចំប្រព័ន្ធសុវត្ថិភាព ក្រោមវត្តមានអញ្ជើញចូលរួមពីលោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន នាថ្ងៃទី៤ ខែកញ្ញា ឆ្នាំ២០២៥។ លោក អ៊ុន ចាន់ដា អភិបាលខេត្តកំពង់ចាម បានមានប្រសាសន៍ថា គម្រោងដាក់ដាំដើមឈើផ្កា យ៉ាងច្រើនសន្ធឹកសន្ធាប់ ដែលពុំធ្លាប់មានពីមុនមកនេះ គឺទទួលបានការឯកភាពទាំងស្រុង ពីក្រសួងពាក់ព័ន្ធ រួមមាន ក្រសួងសាធារណការ និងដឹកជញ្ជូន និងក្រសួងបរិស្ថាន។ លោកអភិបាលខេត្ត លើកឡើងថា ជាមួយគ្នានេះសូមប្រជាពលរដ្ឋ ត្រូវសហការចូលរួម ថែរក្សា ការពារ គឺ «មនុស្ស១គ្រួសារ ថែរក្សាដើមឈើផ្កា១ដើម»។ សំដៅធ្វើយ៉ាងណាឲ្យការធ្វើចរាចរណ៍តាមដងផ្លូវនេះមានសុវត្ថិភាពខ្ពស់ និងបង្កើនសោភ័ណភាពបរិស្ថានតាមដងផ្លូវ។ ក្នុងឱកាសនោះដែរ លោក លឹម ស៊ីដេនីន រដ្ឋលេខាធិការ និងជាប្រធានគម្រោងសាងសង់ផ្លូវជាតិលេខ៧ បានថ្លែងកោតសរសើរដល់រដ្ឋបាលខេត្តកំពង់ចាម ដែលបានពុះពារសហការជាមួយក្រសួងពាក់ព័ន្ធ ជំរុញឲ្យការស្ថាបនាផ្លូវជាតិលេខ៧ ទទួលបានជោគជ័យ គួរជាទីមោទន ដែលគិតមកដល់ពេលនេះ ការដ្ឋានសាងសង់ផ្លូវជាតិលេខ៧ សម្រេចបានប្រមាណជាង ៧០%ហើយ៕