ក្រោយមានការសំណូមពរពីពលរដ្ឋលើកឡើងពីបញ្ហាកំណាត់ផ្លូវលេខ៥១ ខូចខាត ពេលនេះមន្រ្តីជំនាញបានចុះជួសជុលអ៊ុតកៅស៊ូឡើងវិញ។ជាក់ស្តែងនៅរសៀលថ្ងៃទី ២៤ ខែសីហា ឆ្នាំ២០២៥ នៅកំណាត់ផ្លូវលេខ ៥១ ក្នុងសង្កាត់បឹងកេងកងទី០១ ខណ្ឌបឹងកេងកង មន្រ្តីជំនាញ នៃមន្ទីរសាធារការ នឹងដឹកជញ្ជូនរាជធានីភ្នំពេញ បានចុះជួសជុលជង្ហុកធំ ដែលនៅកណ្តាលផ្លូវ រួចអ៊ុតកៅស៊ូឡើងវិញ។ពលរដ្ឋធ្វើដំណើរឆ្លងកាត់បានឲ្យដឹងថា ជង្ហុកធំនៅកណ្តាលផ្លូវស្ថិតលើផ្លូវលេខ ៥១ បើមើលតាមស្នាមដូចជាមានការកាត់ ឬជួសជុល ប៉ុន្តែមិនដឹងមន្រ្តីជំនាញខាងណាកាត់ហើយក៏ទុកចោលបែបនេះ ដែលធ្វើឲ្យមានជង្ហុកធំទឹកដក់ កណ្តាលផ្លូវ។ ពលរដ្ឋបន្តថា ដោយឃើញដូច្នេះក៏បានរាយការណ៍ជូនមន្រ្តីមូលដ្ឋានឲ្យចុះជួយត្រួតពិនិត្យតាមរយៈប្រព័ន្ធតេលេក្រាម ដើម្បីជៀសវាងមានបង្កគ្រោះថ្នាក់ណាមួយជាយថាហេតុ។ពាក់ព័ន្ធបញ្ហានេះ លោកស្រី ដោ សម្ផស្ស នាយិកាទីចាត់ការរដ្ឋបាលនិងជាអ្នកនាំពាក្យរបស់រដ្ឋបាលរាជធានីភ្នំពេញ បានឲ្យដឹងថា លោកស្រីបានចាត់ឲ្យមន្រ្តីជំនាញពាក់ព័ន្ធ ចុះមកជួសជុលផ្លូវដែលខូចខាតខាងលើនេះហើយ ដើម្បីអ៊ុតកៅស៊ូឡើងវិញ ដើម្បីសម្រួលលើការធ្វើដំណើររបស់ប្រជាពលរដ្ឋ កុំឲ្យជួបការលំបាកបន្តទៀត៕