វេទិកាសាធារណៈថ្នាក់ជាតិ ដើម្បីត្រួតពិនិត្យ និងគាំទ្រការអនុវត្តកម្មវិធីគោលនយោបាយ និងយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលសម្រាប់នីតិកាលទី៧ នៃរដ្ឋសភា នៅឃុំស្រែអំពូម ស្រុកពេជ្រាដា មណ្ឌលគិរី៖ នាថ្ងៃពុធ ទី២០ ខែសីហា ឆ្នាំ២០២៥ ឯកឧត្តម អ៊ីន តុងអាន អនុរដ្ឋលេខាធិការ ទីស្តីការគណៈរដ្ឋមន្ត្រី និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកពេជ្រាដា បានអញ្ជើញជាអធិបតីក្នុងវេទិកាសាធារណៈថ្នាក់ជាតិ ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល សម្រាប់នីតិកាលទី៧ នៃរដ្ឋសភា។ វេទិកាសាធារណៈនេះ មានការអញ្ជើញចូលរួមពី លោក វណ្ណា ម៉ាប់ អភិបាល នៃគណៈអភិបាលស្រុកពេជ្រាដា លោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំងបីប្រភេទ អាជ្ញាធរស្រុក/ភូមិ/ឃុំ និងប្រជាពលរដ្ឋសរុបចំនួន ៩៤នាក់ ដោយប្រព្រឹត្តទៅនៅភូមិពូក្រេង ឃុំស្រែអំពូម ស្រុកពេជ្រាដា ខេត្តមណ្ឌលគិរី។ ក្រោមការដឹកនាំ និងសម្របសម្រួលពីឯកឧត្តមអនុប្រធាន វេទិកានេះបានជជែកពិភាក្សាយ៉ាងផលផុស លើការឆ្លើយតប និងស្វែងរកដំណោះស្រាយជូនប្រជាពលរដ្ឋមូលដ្ឋាន ក៏ដូចជាផ្សព្វផ្សាយគោលនយោបាយ និងសមិទ្ធផលសំខាន់ៗរបស់រាជរដ្ឋាភិបាល ដែលសម្រេចបាន និងកំពុងអនុវត្ត ដើម្បីឱ្យប្រជាពលរដ្ឋបានជ្រាបច្បាស់ ដោយក្នុងវេទិកានេះដែរ ប្រជាពលរដ្ឋបានលើកឡើងពីសំណើ សំណូមពរចំនួន ៤ វិស័យ រួមមាន៖ វិស័យផ្លូវ តម្លៃកសិផល វិស័យធនធានទឹក វិស័យសន្តិសុខសាធារណៈ៕