កិច្ចប្រជុំពិភាក្សាស្ដីពីការធ្វើបច្ចុប្បន្នកម្មយុទ្ធសាស្ត្រការកែទម្រង់ប្រព័ន្ធគ្រប់គ្រងការវិនិយោគសាធារណៈ និងផែនការសកម្មភាពលម្អិត សម្រាប់អនុវត្តយុទ្ធសាស្ត្រ (PIMSRS) របស់ក្រសួងសាធារណការ និងដឹកជញ្ជូន ទីស្តីការក្រសួង៖ នាថ្ងៃទី១៤ ខែសីហា ឆ្នាំ២០២៥ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុ សាធារណ:ក្រសួង បានទទួលជួបពិភាក្សាការងារជាមួយ ឯកឧត្តម ប៉ែន ធីរុង្គ រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការរង នៃអគ្គលេខាធិការដ្ឋានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ (អ.គ.ហ) លើការប្រមូលធាតុចូលក្នុងការធ្វើបច្ចុប្បន្ន PIMSRS របស់ក្រសួងសាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំក្រសួង តំណាងអគ្គនាយកដ្ឋានក្រោមឱវាទ និងមន្ត្រីជំនាញពាក់ព័ន្ធជាច្រើនរូបផ្សេងទៀត។ កិច្ចប្រជុំនេះ ត្រូវបានរៀបចំឡើងក្នុងគោលបំណងដើម្បីប្រមូលធាតុចូលបន្ថែម និងស្វែងរកដំណោះស្រាយលើបញ្ហាប្រឈមនានា លើផែនការសកម្មភាពលម្អិត PIMSRS របស់ក្រសួងសាធារណការ និងដឹកជញ្ជូន ឱ្យមានសង្គតិភាព គ្រប់ជ្រុងជ្រោយ និងមានលក្ខណៈល្អប្រសើរឡើង ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលអាណត្តិទី៧។ លោកជំទាវរដ្ឋលេខាធិការប្រចាំការ ក៏បានថ្លែងអំណរគុណចំពោះសមាជិកអង្គប្រជុំ ដែលបានចូលរួមយ៉ាងផុលផុសក្នុងការផ្ដល់នូវមតិយោបល់ល្អៗ ដែលបានផ្តល់ធាតុចូលសំខាន់ៗជាច្រើនក្នុងការរួមចំណែកធ្វើយ៉ាងណាឱ្យPIMSRS របស់ក្រសួងសាធារណការ និងដឹកជញ្ជូន មានភាពគ្រប់ជ្រុងជ្រោយ ប្រទាក់ក្រឡាគ្នា ត្រឹមត្រូវ ច្បាស់លាស់ ជាត្រីវិស័យសម្រាប់ជួយពន្លឿនការងារនេះឱ្យកាន់តែឆាប់រហ័ស ដើម្បីដាក់ជូនថ្នាក់ដឹកនាំក្រសួងពិនិត្យនាពេលឆាប់ៗខាងមុខ៕