ដោយស្ដង់ដារ។ ឯកឧត្តម ពៅ ម៉ាលី រដ្ឋលេខាធិការក្រសួងសាធារណការ និងដឹកជញ្ជូនបានមានប្រសាសន៍ថា ការចូលរួមជួយរបស់ក្រុមបច្ចេកទេសយានយន្ដរបស់ប្រទេសជប៉ុនដល់ក្រុមអ្នកជំនាញកម្ពុជាបានផ្ដល់នូវចំណេះដឹង និងបទពិសោធន៍ក្នុងការរៀបចំបែបបទបច្ចេកទេសនានា ជាពិសេសការបង្កើននូវសមត្ថភាព និងបណ្ដុះបណ្ដាលធនធានមនុស្សដល់កម្ពុជា។ ក្នុងកិច្ចប្រជុំអ្នកបច្ចេកទេសអាស៊ីឆ្នាំ២០១៨ ស្ដីពីការបកស្រាយកិច្ចព្រមព្រៀងអន្ដរជាតិលើបទបញ្ញត្ដិយានយន្ដឆ្នាំ១០៥៨ នារសៀលថ្ងៃទី១៦ ខែតុលានេះ នៅទីស្ដីការក្រសួងធាធារណការ ឯកឧត្តម ពៅ ម៉ាលី បានបញ្ជាក់ថា ការចែករំលែកនូវចំណេះដឹង និងព័ត៌មានអំពីបច្ចេកទេសយានយន្ដនេះ នឹងជួយដល់អ្នកជំនាញកម្ពុជា ទទួលបាននូវចំណេះដឹង ជំនាញបច្ចេកទេស និងបទពិសោធន៍ សម្រាប់រៀបចំគោលការណ៍ និងបទដ្ឋានបច្ចេកទេស ស្របទៅតាមស្ដង់ដារអន្ដរជាតិ។ ឯកឧត្តមបានបន្ដថា ការចូលរួមសហការ និងការផ្ដល់បច្ចេកទេសពីមជ្ឈមណ្ឌលយានយន្ដស្ដង់ដារអន្ដរជាតិនៃប្រទេសជប៉ុនដល់ក្រសួងសាធារណការ និងដឹកជញ្ជូនកម្ពុជានេះ គឺពិតជាមានសារៈសំខាន់ណាស់ ក្នុងការរួមចំណែកផ្ដល់ជាគំនិត និងយោបល់សម្រាប់ការរៀបចំ និងទទួលយកនូវបទដ្ឋានបច្ចេកទេសយានយន្ដ ដែលអន្ដរជាតិទទួលស្គាល់។ បើយោងមន្រ្ដីជំនាញ នៃមជ្ឈមណ្ឌលយានយន្ដស្ដង់ដារអន្ដរជាតិនៃប្រទេសជប៉ុន បានឱ្យដឹងថា ជប៉ុននឹងបន្ដគាំទ្រ និងជួយដល់ប្រទេសកម្ពុជា ក្នុងការរៀបចំបញ្ញត្ដិ និងបង្កើតស្ដង់ដារបច្ចេកទេសយានយន្ដ ព្រមទាំងប្រព័ន្ធគ្រប់គ្រងយានយន្ដ សម្រាប់អនុម័ត ដើម្បីធានាសុវត្ថិភាពក្នុងការប្រើប្រាស់៕ (អត្ថបទ៖ ប៉ូ សុផានិត រូបភាព៖ ម៉ាន់ កុសីមា ១៦ ១០ ២០១៨)