កម្មវិធីការពារសារណាបញ្ចប់ថ្នាក់បរិញ្ញាបត្រ របស់និស្សិតវិទ្យាស្ថានតេជោសែន សាធារណការ និងដឹកជញ្ជូន ជំនាន់ទី១ ឯកទេសនាវាចរណ៍ និងឯកទេសសំណង់សាធារណការ ទីស្តីការក្រសួង៖ នាថ្ងៃសុក្រ ទី១ ខែសីហា ឆ្នាំ២០២៥ ឯកឧត្តម ប្រាងហង្ស សេរីរិទ្ធ នាយកវិទ្យាស្ថាន តេជោសែន សាធារណការ និងដឹកជញ្ជូន និងជាប្រធានគណ:កម្មការការពារសារណា អមដំណើរដោយ លោក លោកស្រី ជាថ្នាក់ដឹកនាំនាយកដ្ឋាន និងអនុគណៈកម្មការមេប្រយោគ និងអ្នកវាយតម្លៃ បានអញ្ជើញជាអធិបតីក្នុងការត្រួតពិនិត្យដំណើរការនៃការការពារសារណារបស់និស្សិតវិទ្យាស្ថានតេជោសែន សាធារណការ និងដឹកជញ្ជូន។ ជាមួយនេះផងដែរ ក៏មានការអញ្ជើញចូលរួមពីសំណាក់តំណាងកំពង់ផែស្វយ័តភ្នំពេញ និងតំណាងកំពង់ផែស្វយ័តក្រុងព្រះសីហនុ ដែលជាភាគីពាក់ព័ន្ធសំខាន់នៃវិស័យឯកទេសនាវាចរណ៍ ដោយផ្តល់ការជួយលើការវាយតម្លៃ និងផ្ដល់យោបល់ដល់សារណានិស្សិត។ កម្មវិធីការពារសារណានេះមានរយៈពេល ៤ថ្ងៃ ចាប់ពីថ្ងៃទី២៩ ដល់ថ្ងៃទី១ ខែសីហា ឆ្នាំ២០២៥ ដោយក្រុមនិស្សិតចំនួន ២១ក្រុម ដែលបានសិក្សាលើជំនាញមួយចំនួន រួមមានៈ ១.) សំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងកំពង់ផែ ២.) ប្រព័ន្ធចម្រោះទឹកកខ្វក់ និង ៣.)បើកបរនាវា ដែលជាឱកាសមួយសម្រាប់និស្សិតយកកិច្ចការសារណា ដែលខ្លួនបានសិក្សាស្រាវជ្រាវមកបង្ហាញ និងការពារចំពោះគណៈកម្មការវិនិច្ឆ័យ ជាគ្រូបង្គោលដែលមានបទពិសោធន៍ និងជាមន្រ្តីបច្ចេកទេសរបស់ក្រសួងសាធារណការ និងដឹកជញ្ជូន៕