(កំពង់ធំ)៖ លោក ហាក់ ម៉ុងហួត អភិបាលស្រុកតាំងគោក និងព្រះមុនីសីលវង្ស តុន ពិសី ព្រះគ្រូចៅអធិការវត្តគុហនគរ នាថ្ងៃទី២៧ ខែកក្កដា ឆ្នាំ២០២នេះ បានបើកការដ្ឋានសាងសង់ផ្លូវបេតុង ១ខ្សែ ប្រវែង ១,២៣៧ម៉ែត្រ ដែលមានថវិកាមូលនិធិឃុំឆ្នាំ២០២៥ ប្រវែង ៩១០ម៉ែត ទទឹង៥ម៉ែត្រ និងអំណោយរបស់ព្រះចៅអធិការវត្តគុហនគរប្រវែង ៣២៧ ម៉ែត្រ ទទឹង៦ម៉ែត្រ ស្ថិតនៅភូមិថ្នល់កែង ភូមិត្រដកពង ភូមិអមទង ឃុំពង្រ ស្រុកតាំងគោក។ ផ្លូវមួយខ្សែនេះ ជាផ្លូវដ៏សំខាន់ក្នុងការសម្រួលការធ្វើដំណើរ ជំរុញសេដ្ឋកិច្ច និងដឹកជញ្ជូនជូនប្រជាជនឱ្យកាន់តែងាយស្រួល។ នាឱកាសនោះ លោក ហាក់ ម៉ុងហួត បានឱ្យដឹងថា ផ្លូវមួយខ្សែគឺជាផ្លូវជំរុញសេដ្ឋកិច្ចមូលដ្ឋានយ៉ាងសំខាន់ ជាផ្លូវសម្រាប់ប្រជាជនធ្វើដំណើរទៅធ្វើស្រែចម្ការ និងដឹកជញ្ជូនកសិផលទៅកាន់ទីផ្សារ និងការប្រកបមុខរបរផ្សេងៗ ហើយក៏ជាផ្លូវដែលសិស្សានុសិស្សត្រូវធ្វើដំណើរទៅសាលាជាចាំបាច់។ លោក ហាក់ ម៉ុងហួត បានបន្ថែមទៀតថា ពីដើមឡើយផ្លូវនេះជាផ្លូវក្រាលក្រួសក្រហម ប៉ុន្តែក្រោយពេលព្រះគ្រូ តុន ពិសី ផ្ដួចផ្ដើមគំនិតកែលម្អទៅជាផ្លូវបេតុង។ លោកអភិបាលស្រុក ក៏បានកោតសរសើរចំពោះការលះបង់របស់ព្រះចៅអធិការដែលបានរួមចំណែកអភិវឌ្ឍន៍ឃុំពង្រឲ្យកាន់តែរីកចម្រើន និងមានភាពស្រស់បំព្រងនៅតាមដងផ្លូវ ដូចជាព្រះអង្គដឹកនាំពុទ្ធបរិស័ទ ដាំដើមក្ងោក និងដាក់អំពូលសូឡាបំភ្លឺលើដងផ្លូវ។ លោកក៏បានក្រើនរំលឹកដល់អាជ្ញាធរដែនដី ត្រូវផ្តល់កិច្ចសហការជាមួយក្រុមការងារសាងសង់ ក្នុងការបង្កលក្ខណៈងាយស្រួល ដើម្បីឱ្យក្រុមការងារមានលទ្ធភាពខ្ពស់ក្នុងការសាងសង់ បានលឿន និងទាន់ពេល និងបានសំណូមពរដល់ប្រជាពលរដ្ឋនៅតាមដងផ្លូវមេត្តាអធ្យាស្រ័យ នៅពេលសាងសង់ផងដែរ៕