(បន្ទាយមានជ័យ)៖ ផ្លូវមួយខ្សែដែលរងការខូចខាតស្ទើទាំងស្រុងមានប្រវែង១៣គីឡូម៉ែត្រ ពីភូមិកុងសៀម ឃុំណាំតៅ ទៅភូមិកូនខ្លែង, ភូមិធ្មេញត្រ, ភូមិតេជោសន្តិភាពការ៉េពីរ ក្នុងឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ត្រូវបានយកចិត្តទុកដាក់ពីថ្នាក់ដឹកនាំ ក្នុងការស្ថាបនា ជួសជុលឡើងវិញ។ ជាក់ស្តែងនៅថ្ងៃទី២៣ ខែកក្កដា ឆ្នាំ២០២៥ លោក ប្លែក វ៉ារី ប្រធានក្រុមប្រឹក្សាខេត្ត និងលោក អ៊ុំ រាត្រី អភិបាលខេត្ត បានដឹកនាំក្រុមការងារស្ថាបនា ជួសជុលឡើងវិញនូវផ្លូវខាងលើដោយក្រាលថ្ម កៀរកិនបង្ហាប់សម្រួលដល់ការ ធ្វើដំណើរ របស់បងប្អូនប្រជាពលរដ្ឋនៅក្នុងមូលដ្ឋាន ជាពិសេសដឹកជញ្ជូនកសិផលផ្សេងៗ។ ប្រជាពលរដ្ឋដែលធ្វើដំណើរតាមដងផ្លូវបានសម្តែងនូវក្តីសប្បាយរីករាយ នៅពេលដែលឃើញផ្លូវខាងលើត្រូវបានស្ថាបនា ជួសជុលឡើងវិញជូនដល់ពួកគាត់ក្នុងការធ្វើដំណើរ។ ពួកគាត់បានលើកឡើងពីផលវិបាកនៅដូវវស្សាពិបាកធ្វើដំណើរ ទៅទីរួមស្រុក ក៏ដូចជាសិស្សានុសិស្ស ទៅរៀនសូត្រនៅទីរួមស្រុក។ ពួកគាត់ថា កន្លងមកផ្លូវមួយខ្សែខាងលើ នៅរដូវរស្សាមានការជន់លិចដោយសាទឹកជំនន់ ពិបាកធ្វើដំណើរ ពិសេសនៅពេលឈឺស្កាត់ពិបាកធ្វើដំណើរ ទៅមណ្ឌលសុខភាព ដោយត្រូវប្រើពេលវេលាច្រើន តែនៅពេលផ្លូវនេះបានជួសជុលឡើងវិញ ពួកគាត់ពិតជាសប្បាយចិត្តយ៉ាងខ្លាំង និងថ្លែងអំណរគុណលោក អ៊ុំ រាត្រី ដែលតែងតែគិតគូរយកចិត្តទុកដាក់ពីសុខទុក្ខរបស់ពលរដ្ឋនៅមូលដ្ឋាន។ លោក ឃុត ឃួន មេប៉ោយចារ បានថ្លែងអំណរគុណលោកអភិបាលខេត្ត ដែលបានយគ្រឿងចក្រ ជួសជុលស្ថាបនាផ្លូវ ជូនពលរដ្ឋបានធ្វើដំណើរស្រួល ទៅទីរួមស្រុក ទៅព្យាបាលជំងឺនៅមន្ទីរពេទ្យបង្អែកស្រុក ក៏ដូចជាសិស្សានុស្សទៅសិក្សារៀនសូត្រជាដើម។ លោកបន្តថា ផ្លូវខាងលើនេះ គឺជាផ្លូវសេដ្ឋកិច្ចសំខាន់សម្រាប់ស្រុកផងដែរក្នុងការធ្វើដំណើរដឹកជញ្ជូនកសិកផលផ្សេងៗ ឆ្លងកាត់ចំនួន៥ភូមិ ដោយភ្ជាប់ទៅភូមិតេជោសន្តិភាពការ៉េ និងទៅខេត្តឧត្តរមានជ័យ៕