លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក.) បានបញ្ជាក់ថា ស.ស.យ.ក. គាំទ្រ និងចូលរួមសហការយ៉ាងពេញទំហឹង ជាមួយវេទិកាសុវត្ថិភាពដងផ្លូវកម្ពុជា ដើម្បីកាត់បន្ថយអត្រាគ្រោះថ្នាក់ចរាចរណ៍នៅកម្ពុជា។ លោក ហ៊ុន ម៉ានី ថ្លែងដូច្នេះ នៅចំពោះមុខអ្នកសារព័ត៌មាន នាពិធីសម្ពោធផ្លូវការវេទិកាប្រព័ន្ធផ្សព្វផ្សាយ ស្តីពីសុវត្ថិភាពដងផ្លូវកម្ពុជា (Cambodia’s Road Safety) ដែលរៀបចំឡើងដោយសហព័ន្ធកីឡាយានយន្ត និងវប្បធម៌រថយន្តកម្ពុជា (Cambodia Car Culture) កាលពីរសៀលថ្ងៃទី២០ ខែកក្កដា នៅបរិវេណពហុកីឡដ្ឋានជាតិមរតកតេជោ។ប្រធានស.ស.យ.ក. បន្ថែមថា៖ «បញ្ហាចម្បងជាងគេ ដោយយើងមើលឃើញថា គ្រោះថ្នាក់ចរាចរណ៍នាំទៅដល់ការបាត់បង់អាយុជីវិត ការពិការភាព បាត់បង់ទ្រព្យសម្បត្តិសាធារណៈ និងឯកជន ហើយអ្នកពិការភាពរបស់សមាជិកគ្រួសារមួយក៏ជាបន្ទុកដ៏ធ្ងន់ធ្ងររបស់ក្រុមគ្រួសារនីមួយៗ។»។ សម្រាប់លោក ហ៊ុន ម៉ានី ការបាត់បង់ជីវិតមនុស្សជាស្រលាញ់ ជាសមាជិកក្រុមគ្រួសារ ឬជួបហេតុការគ្រោះចរាចរណ៍ រហូតមានពិការភាពរបស់ប្រជាជនកម្ពុជា នឹងធ្វើឱ្យមានការបាត់បង់ និងចុះអន់ថយ នូវធនធានមនុស្សក្នុងមាគាការអភិវឌ្ឍប្រទេសកម្ពុជាឱ្យល្អប្រសើរឡើង។ ហេតុដូច្នេះ លោក បានអំពាវនាងឱ្យពលរដ្ឋចូលរួមគោរព អនុវត្តច្បាប់ចរាចរណ៍ផ្លូវគោកកម្ពុជា ក៏ដូចជាបើកបរដោយមានសុវត្ថិភាពទំនួសខុសត្រូវខ្ពស់ ក្នុងពេលបើកបរដើម្បីជាការទប់ស្កាត់សោកនាដកម្មបាត់បង់ជីវិត ធ្លាប់ឃើញកើតមានតាមរយៈរូបភាពនៃគ្រោះថ្នាក់ចរាចរណ៍។លោក ហ៊ុន ម៉ានី លើកឡើងពីបំណងសំខាន់នៃ ប្រព័ន្ធផ្សព្វផ្សាយសង្គមថ្មីមួយនេះដូច្នេះថា៖«យើងបានសហការគ្នា រៀបចំប្រកាសដាក់ដំណើរការកម្មវិធី Cambodia’s Road Safety ក្នុងគោលបំណងធំបំផុត ដើម្បីគិតគូរួមចំណែកជាមួយរដ្ឋាភិបាលទប់ស្កាត់បញ្ហាគ្រោះថ្នាក់ចរាចរណ៍ ផ្សព្វផ្សាយឱ្យយល់ដឹងពីច្បាប់ចរាចរណ៍កាន់តែទូលំទូលាយ។ យើងយល់ឃើញថា បញ្ហាគ្រោះថ្នាក់ចរាចរណ៍ នាំឱ្យការបាត់បង់អាយុជីវិត ពិការភាព ទ្រព្យសម្បត្តិសាធារណៈឯកជន ហើយគ្រោះថ្នាក់ចរាចរណ៍បង្កឱ្យមានពិការភាព ក៏ជាបន្ទុកធ្ងន់ធ្ងរសម្រាប់ក្រុមគ្រួសាររងគ្រោះនីមួយៗ ដែលរឿងនេះរួមចំណែកធ្វើឱ្យដំណើរការអភិវឌ្ឍប្រទេសកម្ពុជា ចុះអន់ថយផងដែរ។»។ រដ្ឋមន្ត្រីក្រសួងមុខងារសាធារណៈ ក៏បានលើកជាឧទាហរណ៍ ករណីគ្រោះថ្នាក់ចរាចរណ៍របស់តារាចម្រៀងរ៉េប លោក Ruth Ko លើបណ្តោញផ្លូវ ៦០ម៉ែត្រ បង្កឡើងដោយភាគីរថយន្តមួយគ្រឿងបើកបរបញ្ច្រាសរំលោភបំពានទិសផ្លូវធ្វើដំណើរ និងស្ថិតក្នុងស្ថានភាពស្រវឹង រហូតធ្វើឱ្យបាត់បង់ធនធនមនុស្សម្នាក់ដ៏សំខាន់ ប្រព័ន្ធឧស្សាហកម្មតន្ត្រី និងចម្រៀងកម្សាន្តក្នុងប្រទេសកម្ពុជា។រយៈពេល ៥ឆ្នាំ ចុងក្រោយ គិតចាប់តាំងពីឆ្នាំ ២០២០ មក ទិន្នន័យគ្រោះថ្នាក់ចរាចរណ៍ នៅទូទាំងប្រទេសកម្ពុជា បង្ហាញក្នុងពិធីបើកសម្ពោធប្រព័ន្ធផ្សព្វផ្សាយ សុវត្ថិភាពដងផ្លូវកម្ពុជានោះ មានសរុបប្រមាណ ១៤ ៩៨៦ករណី ដោយមានអ្នកស្លាប់ចំនួន ៨ ០៥០នាក់ និងរងរបួសដោយគ្រោះថ្នាក់ចរាចរណ៍សរុប ២០ ៥៦២នាក់។ ក្នុងករណីសរុបនោះ អ្នកបើកបរស្ថិតក្នុងស្ថានភាពស្រវឹងមានប្រមាណ ១៥ភាគរយ បើកបរម៉ូតូមិនពាក់មួកសុវត្ថិភាព ៨០ភាគរយ បើកបរក្នុងល្បឿនលឿនហួសល្បឿនកំណត់ ៤០ភាគរយ ប្រើទូរស័ព្ទពេលបើកបរ ១៥ភាគ និងបើកបររថយន្តមិនពាក់ខ្សែក្រវ៉ាត់ ២០ភាគរយ។ ដោយឡែក លោក ទៀ ស្យាម អនុប្រធានសហព័ន្ធកីឡាយានយន្តកម្ពុជា និងជាស្ថាបនិក វប្បធម៌រថយន្តកម្ពុជា(Cambodia Car Culture) លើកឡើងថា ព្រោះតែកត្តាភាពស្មុកស្មាញការធ្វើដំណើរលើដងផ្លូវក្នុងប្រទេសកម្ពុជា ក្នុងនាមជាអ្នកបើកបរផ្ទាល់ ឃើញមានកើតគ្រោះថ្នាក់ចរាចរណ៍ច្រើនលើដងផ្លូវ ទើបធ្វើឱ្យមានការបង្កើតកម្មវិធីវេទិកាប្រព័ន្ធផ្សព្វផ្សាយ ស្តីពីសុវត្ថិភាពដងផ្លូវកម្ពុជា( Cambodia Road’s Safety) នេះឡើង។ វេទិការដដែល គឺដើម្បីបញ្ចៀបការយល់ដឹងដល់ពលរដ្ឋ ពិសេសសិស្សានុសិស្សតាមសាលារៀន យុវវ័យ ឱ្យដឹងច្បាស់លាស់បន្ថែមទៀត ពីច្បាប់ចរាចរណ៍ផ្លូវគោក ដើម្បីជួយធ្វើឱ្យវិថីនៅកម្ពុជា ក្លាយជាវិថីមានសុវត្ថិភាពច្រើនជាងមុន។