កិច្ចប្រជុំពិនិត្យវឌ្ឍនភាពការងាររបស់វិទ្យាស្ថានតេជោសែន សាធារណការ និងដឹកជញ្ជូន ទីស្ដីការក្រសួង៖ នាថ្ងៃសុក្រ ទី១១ ខែកក្កដា ឆ្នាំ២០២៥ ឯកឧត្តម ហេង ណន រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិនិត្យវឌ្ឍនភាពការងាររបស់វិទ្យាស្ថានតេជោសែន សាធារណការ និងដឹកជញ្ជូន ដោយមានការចូលរួមពីសំណាក់ ឯកឧត្តមអនុរដ្ឋលេខាធិការទទួលបន្ទុក ឯកឧត្តមនាយកវិទ្យាស្ថាន លោក- លោកស្រី ជានាយករង ប្រធាននាយកដ្ឋាន និងមន្ត្រីពាក់ព័ន្ធ។ កិច្ចប្រជុំនេះរៀបចំឡើងដើម្បីពិនិត្យវឌ្ឍនភាពការងារ លិខិតបទដ្ឋានគតិយុត្តិ សមិទ្ធផល សកម្មភាពការងារ ដែលវិទ្យាស្ថានបានអនុវត្តកន្លងមក ព្រមទាំងបញ្ហាប្រឈមនានាចំពោះមុខ ក្នុងទិសដៅប្រែក្លាយវិទ្យាស្ថានទៅជាគ្រឹះស្ថានសាធារណៈរដ្ឋបាលនាពេលអនាគត ។ ថ្លែងទៅកាន់អង្គប្រជុំ ឯកឧត្ដមនាយកវិទ្យាស្ថាន បានរាយការណ៍របាយការណ៍សង្ខេប អំពីសាវតាវិទ្យាស្ថាន សមិទ្ធផលការងារដែលវិទ្យាស្ថានបានបំពេញកន្លងមក និងទិសដៅការងារនាពេលខាងមុខ របស់វិទ្យាស្ថាន។ បន្ថែមពីនេះ ឯកឧត្ដមរដ្ឋលេខាធិការ បានកោតសរសើរ អំពីសមិទ្ធផល ដែលវិទ្យាស្ថានសម្រេចបាន និងបានលើកទឹកចិត្ដដល់ថ្នាក់ដឹកនាំវិទ្យាស្ថាន មន្ដ្រីរាជការ និងបុគ្គលិកវិទ្យាស្ថាន ឱ្យខិតខំប្រឹងប្រែងបំពេញការងារបន្ថែមទៀត សំដៅកសាងមូលធនមនុស្ស ដែលជាយុវជនបន្ដវេន ក្នុងវិស័យសាធារណការ និងដឹកជញ្ជូន ឱ្យមានភាពប្រសើរឡើង៕