ឯកឧត្ដម ប៉ាល់ ចន្ទតារា ដឹកនាំក្រុមការងារររាជរដ្ឋាភិបាលចុះមូលដ្ឋានស្រុកស្អាង នាំយកទៀនព្រះវស្សា និងទេយ្យវត្ថុ រួម ទាំងបច្ច័យប្រគេនដល់ព្រះសង្ឃចំនួន៣៦វត្ត នៅវត្តសែនខន្តីបារមីមានឫទ្ធិ ភូមិវាលត្រែង ឃុំតាលន់ ស្រុកស្អាង កណ្តាល៖ នាថ្ងៃពុធ ទី៩ ខែកក្កដា ឆ្នាំ២០២៥ ឯកឧត្តម ប៉ាល់ ចន្ទតារា រដ្ឋលេខាធិការ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកស្អាង ជាប្រធានក្រុមការងាររាជរដ្ឋាភិបាលចុះមូលដ្ឋានជួយឃុំតាលន់ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្អាង បានដឹកនាំក្រុមការងារនាំយកទៀនព្រះវស្សានិងទេយ្យវត្ថុ រួមទាំងបច្ច័យប្រគេនដល់ព្រះសង្ឃចំនួន ៣៦ វត្ត ដែលពិធីនេះធ្វើឡើងជារួមនៅវត្តសែនខន្តីបារមីមានឫទ្ធិ ភូមិវាលត្រែង ឃុំតាលន់ ស្រុកស្អាង។ ពិធីប្រគេនទៀនព្រះវស្សា និងទេយ្យវត្ថុទាំងនេះ មានការអញ្ជើញចូលរួមពី ឯកឧត្តម លោកជំទាវ ជាថ្នាក់ដឹកនាំ លោក លោកស្រី មន្ត្រីរាជការមកពីអង្គភាពក្រោមឱវាទក្រសួង លោកអភិបាលស្រុក ព្រមទាំងសមត្ថកិច្ចពាក់ព័ន្ធ និងពុទ្ធបរិស័ទចំណុះជើងវត្តជិតឆ្ងាយ។ នាឱកាសនោះដែរ មានការប្រារព្វពិធីតាមបែបព្រះពុទ្ធសាសនាដូចជា៖ ធ្វើកិច្ចនមស្សការ ថ្វាយបង្គំព្រះរតនត្រ័យ សមាទានសីល រួចវេរប្រគេនទៀនព្រះវស្សា ទេយ្យវត្ថុ និងគ្រឿងបរិក្ខារប្រគេនដល់ព្រះសង្ឃផងដែរ។ ពិធីនេះរៀបចំឡើងដើម្បីថ្វាយប្រគេនព្រះសង្ឃ សម្រាប់ប្រើប្រាស់តាមតម្រូវការខណៈពេលដែលព្រះសង្ឃនឹងគង់ចាំព្រះវស្សារយៈពេល៣ខែក្នុងរដូវវស្សា និងឧទ្ទិសកុសលផលបុណ្យ បួងសួងសុំសេចក្តីសុខសេចក្តីចម្រើនកើតមានដល់ក្រុមគ្រួសារនៃញាតិសណ្តានរបស់មន្ត្រីរាជការក្រោមឱវាទក្រសួងសាធារណការ និងដឹកជញ្ជូន ព្រមទាំងបងប្អូនប្រជាពលរដ្ឋរស់នៅក្នុងស្រុកស្អាង និងប្រជាជនខ្មែរគ្រប់ៗរូបទទួលបាននូវសេចក្តីសុខសប្បាយផងដែរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube