ខេត្តមណ្ឌលគិរី មិនត្រឹមតែល្បីល្បាញលើផ្នែកទេសចរណ៍នោះទេ ជាមួយគ្នានេះបន្លែធម្មជាតិ ក៏មានឈ្មោះបោះសំឡេង ឈានដល់មានការបញ្ជាទិញ និងចុះកិច្ចសន្យាជាមួយក្រុមហ៊ុនជាច្រើន ដើម្បីផ្គត់ផ្គង់ទីផ្សារក្នុងប្រទេសផងដែរ។ វិស័យកសិកម្មនៅខេត្តមណ្ឌលគិរី ត្រូវគេសម្លឹងឃើញថាបាននិងកំពុងរីកដុះដាលជាខ្លាំង ដោយសារកត្តាប្រភេទដី និងអាកាសធាតុអំណោយផលទៅលើការដាំដុះបន្លែផ្លែឈើគ្រប់មុខ រួមទាំងដំណាំកសិឧស្សាហកម្មក៏លូតលាស់ល្អផងដែរ។ មន្ទីរកសិកម្ម រុក្ខាប្រមាញ់ និងនេសាទ ខេត្តមណ្ឌលគិរី តម្រង់ទិសឆ្ពោះទៅផលិតកម្មតាមបែបទំនើបកម្មលើកកម្ពស់ផលិតភាពពិពិធកម្ម ដំណាំដែលមានសក្តានុពលលើទីផ្សារដូចជា៖ ស្ពៃក្ដោប ការ៉ុត ស្ពៃបូកគោ ដំឡូងបារាំង ប័រ និងការអភិវឌ្ឍដំណាំឧស្សាហកម្ម ស្វាយចន្ទី ដំឡូងមី កៅស៊ូ ម្រេច កាហ្វេ ជំរុញផលិតកម្មសត្វ វារីប្បកម្ម ការគ្រប់គ្រប់ធនធានព្រៃឈើ និងសត្វព្រៃ ដើម្បីធានាសុវត្ថិភាពស្បៀងក្នុងខេត្ត និងការនាំចេញ។ ដោយឡែកសកម្មភាព និងលទ្ធផលការងាររបស់មន្ទីរកសិកម្ម រុក្ខាប្រមាញ់ និងនេសាទ ខេត្តមណ្ឌលគិរីរួមមាន៖ ការងារផលិតកម្ម និងបសុព្យាបាល ការងារជលផល ការងារព្រៃឈើ ការងារផ្សព្វផ្សាយ និងបណ្ដុះបណ្ដាល ការងារចែកពូជ៕