វគ្គបណ្តុះបណ្តាល ស្តីពី "ការពង្រឹងសមត្ថភាពលេីការរៀបចំផែនការថវិកា ការអនុវត្តថវិកាកម្មវិធី និងការអនុវត្តកិច្ចលទ្ធកម្ម ជូនមន្ត្រីបង្គោលនៅតាមអង្គភាពថវិកា ក្រោមឱវាទក្រសួងសាធារណការ និងដឹកជញ្ជូន កំពត៖ ថ្ងៃព្រហស្បតិ៍ ទី២៦ ខែមិថុនា ឆ្នាំ២០២៥ លោកជំទាវ កុយ សុដានី រដ្ឋលេខាធិការប្រចាំការ និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈរបស់ក្រសួងសាធារណការ និងដឹកជញ្ជូន បានអញ្ជើញជាអធិបតី ក្នុងពិធីបើកវគ្គបណ្តុះបណ្តាល ស្តីពី "ការរៀបចំផែនការថវិកា ការអនុវត្តថវិកាកម្មវិធី និងការអនុវត្តកិច្ចលទ្ធកម្ម ជូនមន្ត្រីបង្គោលនៅតាមអង្គភាពថវិកា ក្រោមឱវាទក្រសួងសាធារណការ និងដឹកជញ្ជូន" និងអង្គភាពថវិកាថ្នាក់មូលដ្ឋាន ដោយមានការអញ្ជើញចូលរួមពីថ្នាក់ដឹកនាំក្រសួង មន្ត្រីជំនាញគ្រប់គ្រងហិរញ្ញវត្ថុ នៃអគ្គនាយកដ្ឋានរដ្ឋបាល និងហិរញ្ញវត្ថុ និងអង្គភាពលទ្ធកម្ម ព្រមទាំងសិក្ខាកាមមកពីអង្គភាពក្រោមឱវាទក្រសួង សរុបប្រមាណ១៤០នាក់។ វគ្គបណ្តុះបណ្តាលនេះត្រូវបានរៀបចំឡើង ក្នុងគោលបំណងពង្រឹងសមត្ថភាពបន្ថែមជូនដល់មន្រ្តីបង្គោលទាំងអស់ ឱ្យបានយល់ដឹងកាន់តែសុីជម្រៅ អំពីការងារគ្រប់គ្រងចំណូល ការងារគ្រប់គ្រងទ្រព្យសម្បត្តិរដ្ឋ ការងារចំណាយតាមរជ្ជទេយ្យបុរេប្រទាន និងការអនុវត្តនីតិវិធីកិច្ចលទ្ធកម្ម ក្នុងនាមជាអង្គភាពថវិកា សរុប ៣៨អង្គភាព ក្នុងនោះ នៅថ្នាក់កណ្តាល ចំនួន ១៣អង្គភាព និងនៅ ថ្នាក់មូលដ្ឋានចំនួន ២៥អង្គភាព គឺមន្ទីរសាធារណការ និងដឹកជញ្ជូនទាំង ២៥ រាជធានី-ខេត្ត។ បន្ថែមពីលេីនេះ វគ្គបណ្តុះបណ្តាលនេះក៏នឹងជាផ្នែកមួយជួយសម្រេចឱ្យបាននូវការអនុវត្តសកម្មភាពនៅក្នុងក្របខ័ណ្ឌនៃការងារកែទម្រង់ការគ្រប់គ្រងហិរញ្ញវត្ថុសាធារណៈរបស់ក្រសួងសាធារណការ និងដឹកជញ្ជូន ក៏ដូចជាការចូលរួមសម្រេចឱ្យបាននូវគោលបំណងគោលនយោបាយរបស់រាជរដ្ឋាភិបាលពាក់ព័ន្ធនឹងកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ ដែលបាននិងកំពុងអនុវត្តនៅក្នុងដំណាក់កាលទី៤ នាពេលបច្ចុប្បន្ននេះ៕