ខេត្តស្វាយរៀង៖ លោក នួន ដាញ៉ិល រដ្ឋលេខាធិការក្រសួងអភិវឌ្ឍន៍ជនបទ តំណាងលោក ឆាយ ប្ញទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ នៅថ្ងៃទី២០ ខែមិថុនា ឆ្នាំ២០២៥ បានដឹកនាំគណៈកម្មការអន្តរក្រសួងរួមមាន ក្រសួងអភិឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ និងមានការចូលរួម លោក លោកស្រីថ្នាក់ដឹកនាំមន្ទីរអភិវឌ្ឍន៍ជនបទខេត្តស្វាយរៀង និងមន្រ្តីបច្ចេកទេស ចុះត្រួតពិនិត្យនិងវាយតម្លៃដំណាក់កាលទី១ លើការងារថែទាំផ្លូវជាប្រចាំ ចំនួន ១៤ខ្សែ។ ក្នុងនោះផ្លូវក្រាលកៅស៊ូពីរជាន់ (DBST) ចំនួន ៨ខ្សែ ប្រវែងសរុប ៩៨ ១០០ម៉ែត្រ ទទឹង ៦ម៉ែត្រ និង ៧ម៉ែត្រ ស្ថិតនៅឃុំមេសថ្ងក ឃុំសំរោង ឃុំញរ ឃសង្កែ ឃុំបុសមន ឃុំចំឡង ឃុំក្រោលគោ ឃុំឈើទាល ឃុំស្វាយធំ ឃុំព្រៃគគីរ ឃុំច្រេស ឃុំឃុំទួលស្តី ឃុំសំរោង ឃុំកំពង់ចក សង្កាត់បាទី និងសង្កាត់ច្រកម្ទេស ដែលមាននៅក្នុងស្រុកគោលដៅចំនួន ៥ មានស្រុករំដួល ស្រុកស្វាយទាប ស្រុកស្វាយជ្រំ ស្រុកកំពង់រោទិ៍ និងក្រុងបាវិត និងផ្លូវកម្រាលល្បាយក្រួស និងខ្សាច់ភ្នំ ចំនួន ៦ខ្សែ ប្រវែងសរុប ៤៧ ៤០០ម៉ែត្រ ទទឹង ៥ម៉ែត្រ និង៦ម៉ែត្រ ស្ថិតនៅឃុំក្រោលគោ ឃុំស្វាយយា ឃុំចំបក់ ឃុំឈើទាល ឃុំព្រៃធំ ឃុំសម្បតិ្តមានជ័យ ឃុំថ្នាធ្នង់ ឃុំអង្គប្រសែ ឃុំអណ្តូងពោធិ៍ ឃុំអំពិល និងឃុំត្រស់ ដែលមាននៅក្នុងស្រុកគោលដៅចំនួន ៣ មានស្រុកស្វាយជ្រំ ស្រុករំដួល និងស្រុករមាសហែក ខេត្តស្វាយរៀង។ ក្នុងឱកាសនៃការចុះត្រួតពិនិត្យវឌ្ឍនភាពការងារនោះផងដែរ ឯកឧត្តមរដ្ឋលេខាធិការក្រសួងអភិវឌ្ឍន៍ជនបទ ក៏បានជួបសំណេះសំណាល និងសាកសួរសុខទុក្ខជាមួយប្រជាពលរដ្ឋ ដែលរស់នៅអមសងខាងផ្លូវខាងលើ។ ក្នុងការពិនិត្យការដ្ឋានផ្លូវខាងលើ លោក នួន ដាញ៉ិល បានណែនាំដល់មន្ទីរអភិវឌ្ឍន៍ជនបទ ខេត្តស្វាយរៀង ត្រូវយកចិត្តទុកដាក់អនុវត្តឱ្យបានត្រឹមត្រូវ តាមបទដ្ឋានបច្ចេកទេស ដើម្បីធានាគុណភាពផ្លូវជាប់ និងប្រើប្រាស់បានយូរអង្វែង។ លោកបានលើកឡើងថា សមិទ្ធផលទាំងអស់នេះ គឺបានមកពីការខិតខំប្រឹងប្រែងរបស់រាជរដ្ឋាភិបាល ក្រោមម្លប់សុខសន្ដិភាពពេញលេញ ដែលបង្កឱកាសឱ្យមានការជួបជុំគ្នាយ៉ាងរីករាយ និងអាចទទួលអត្ថប្រយោជន៍ជាច្រើន ពីសមិទ្ធផលទាំងនេះ ហើយខ្សែផ្លូវជនបទទាំងអស់នេះ នឹងជួយសម្រូលដល់ប្រជាពលរដ្ឋ និងប្រជាកសិករអាចធ្វើដំណើរ មកទទួលសេវានានាបានងាយស្រួល ការដឹកនាំជញ្ជូនកសិផល មកកាន់ទៅរួមខេត្តដោយចំណេញពេលវេលា និងកាត់បន្ថយចំណាយថ្លៃដើម។ តាមរយៈផ្លូវល្អងាយស្រួល ធ្វើដំណើរនាំឱ្យប្រជាពលរដ្ឋចំណេញពេលធ្វើដំណើរទៅធ្វើការ នៅតាមរោងចក្រនិងសហគ្រាសនានា ក្នុងខេត្តស្វាយរៀងផងដែរ៕