ភ្នំពេញ៖ «តេជោសន្តិភាពឫស្សីជ្រុំ» ជាឈ្មោះស្ពានដែលខ្ពស់ជាងគេនៅកម្ពុជា។ ឈ្មោះនេះ ត្រូវបានប្រសិទ្ធនាមដោយ សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា។ នេះបើយោងតាមសេចក្ដីប្រកាសរបស់ ទីស្ដីការគណៈរដ្ឋមន្រ្តី នៅថ្ងៃទី ២៧ ខែឧសភា។ស្ពានតេជោសន្តិភាពឫស្សីជ្រុំ មានកម្ពស់៩០ម៉ែត្រ ប្រវែង ៥៣៧ម៉ែត្រ ទទឹង១០ម៉ែត្រ មានទីតាំងស្ថិតក្នុងភូមិឆាយលូក ឃុំអូសោម ស្រុកវាលវែង ខេត្តពោធិ៍សាត់។ ស្ពាននេះ ស្ថិតក្នុងគម្រោងសាងសង់ផ្លូវជាតិលេខ១០ ដែលតភ្ជាប់ពីខេត្តបាត់ដំបង ពោធិ៍សាត់ និងកោះកុង ដែលចំណាយថវិកាសាងសង់អស់ប្រមាណ ២៣លានដុល្លារ។ ស្ពានដ៏ខ្ពស់ស្កឹមស្កៃនេះ បានបើកឱ្យពលរដ្ឋធ្វើដំណើរជាផ្លូវការ កាលពីថ្ងៃទី ១៥ ខែឧសភា។ ក្រោយដាក់ឱ្យដំណើរការ ស្ពានអាតៃ និងផ្លូវជាតិលេខ១០ កំពុងក្លាយសរសៃឈាមសេដ្ឋកិច្ច ដ៏មានសក្តានុពលរបស់កម្ពុជា តាមរយៈការរួមចំណែកផ្លាស់ប្ដូរពាណិជ្ជកម្ម ពីខេត្តបាត់ដំបង ពោធិ៍សាត់ ទៅកំពង់ផែកោះកុង និងប្រទេសជិតខាង ព្រមទាំងជួយជំរុញ ការវិនិយោគ ដំណាំកសិផល កសិ-ឧស្សាហកម្ម និងទេសចរណ៍បានលឿនរហ័ស និងចំណាយតិចជាងមុន៕