ភ្នំពេញ ៖ ក្រុមការងារក្រសួងសាធារណការនិងដឹកជញ្ជូន បានពិនិត្យទីតាំង ប្រមូលទិន្នន័យ ផ្ទៀងផ្ទាត់និយាមកានិងបោះបង្គោលព្រំដី តាមបណ្តោយ ព្រែកជីកហ្វូណនតេជោ សម្រាប់កំណាត់ទី២ រួចរាល់ ក្នុងភូមិសាស្ត្រខេត្តកណ្តាល។ ក្រុមការងារចុះពិនិត្យ ទីតាំង ប្រមូលទិន្នន័យ ផ្ទៀងផ្ទាត់និយាមកា និងបោះបង្គោលព្រំដី តាមបណ្តោយព្រែកជីកហ្វូណនតេជោ បានបញ្ចប់ការងារ សម្រាប់កំណាត់ទី២ ក្នុងភូមិសាស្ត្រខេត្តកណ្តាលទាំងស្រុង គិតត្រឹមថ្ងៃទី២៤ ខែឧសភា ឆ្នាំ២០២៥។ កិច្ចការខាងលើនេះ ត្រូវបានចាប់ផ្តើមនៅថ្ងៃទី១៧ ខែឧសភា ឆ្នាំ២០២៥ ដោយបន្តពីកំណាត់ទី១ ពីភូមិសាស្ត្រព្រែកពោធិ៍ ស្របតាមបណ្តោយទន្លេបាសាក់ ឆ្ពោះទៅព្រែកតាហ៊ីង ។ ជារួម លទ្ធផលនៃចំនួនបង្គោលដែលបានពិនិត្យនិងបោះរួចរាល់ក្នុងខេត្តកណ្តាលទាំងស្រុង មានចំនួនសរុប ២៣២ បង្គោល និងបានពិនិត្យ និងបោះរួចរាល់ក្នុងខេត្តតាកែវ ចំនួន ៣៨ បង្គោល (ការបោះបង្គោលនៅខេត្តកាកែវ គឺធ្វើឡើងនៅតែផ្នែកខាងស្តាំនៃព្រែកជីក ដែលស្របគ្នាទៅនឹងបង្គោលម្ខាងទៀតនៃព្រែកជីកដែលស្ថិតនៅខេត្តកណ្តាល) ។ ក្រុមការងារ នឹងយកលទ្ធផលដែលទទួលបានពីបេសកកម្មខាងលើ ដើម្បីរៀបចំផែនទីលម្អិត សម្រាប់ដាក់ជូនថ្នាក់ដឹកនាំពិនិត្យ និងសម្រេច មុននឹងក្រុមការងារចុះវាស់វែង ដោះស្រាយផលប៉ះពាល់របស់ក្រសួងសេដ្ឋកិច្ច និងហិរញ្ញវត្ថុ បន្តនីតិវិធីរបស់ខ្លួនក្នុងការជួសជុលសំណងខូចខាតជូនដល់ប្រជាពលរដ្ឋ៕