បើតាមការអះអាងរបស់លោក អ៊ាង សុផល្លែត រដ្ឋមន្រ្តីក្រសួងបរិស្ថានបានឲ្យដឹងថា ផ្លូវទៅភ្នំខ្នងផ្សារដែលទើបសម្ពោធបើកការដ្ឋានស្ថាបនាកាលពីសប្តាហ៍មុននេះ គ្រោងនឹងសាងសង់ឲ្យរួចរាល់ក្នុងរយៈពេល ១ ខែ។ផ្លូវប្រវែងជាង ៧ គីឡូម៉ែត្រ បើតាមជាក់ស្តែងអាចប្រើប្រាស់ពេលប្រហែលមួយខែប៉ុណ្ណោះនឹងរួចរាល់។ យ៉ាងណា ដោយសារពេលនេះជារដូវភ្លៀង អាចបង្កការលំបាកបន្តិចដល់ដំណើរការសាងសង់ ប៉ុន្តែយ៉ាងណាការដ្ឋាននឹងខិតខំសម្រុកស្ថាបនាឲ្យបានរួចរាល់ ដើម្បីសម្រួលការធ្វើដំណើរនិងការកម្សាន្តរបស់ភ្ញៀវទេសចរ។ លោករដ្ឋមន្រ្តីបញ្ជាក់បន្ថែម។តាមរយៈហេដ្ឋារចនាសម្ព័ន្ធទាំងនេះ រដ្ឋមន្រ្តីក្រសួងបរិស្ថានបានថ្លែងថា នឹងចូលរួមលើកកម្ពស់ជីវភាពគ្រួសាររស់នៅសហគមន៍ ដែលប្តូរពីការពឹងផ្អែកលើការកាប់ឈើ និងបរបាញ់សត្វព្រៃខុសច្បាប់ មកចូលរួមចំណែកក្នុងការការពារ និងអភិរក្សធនធានធម្មជាតិ។ផ្លូវចូលទៅភ្នំខ្នងផ្សារបានរៀបចំពិធីបើកការដ្ឋានសាងសង់ រួមទាំងការសាងសង់ហេដ្ឋារចនាសម្ព័ន្ធបម្រើឱ្យគោលដៅលម្ហែបៃតងតំបន់ភ្នំខ្នងផ្សារដែលក្នុងនោះរួមមាន ផ្លូវក្រាលគ្រួសក្រហម (ក្រាលថ្មម៉ិច) ប្រវែង ៧,២ គ.ម ទទឹងប្រវែង ៨ ម៉ែត្រ ចាប់ពីផ្លូវលេខ ៤៨.៤ ដល់ជើងភ្នំឡើងតំបន់ខ្នងផ្សារ និងការបើកសម្ពោធផ្លូវឡើងភ្នំខ្នងផ្សារ និងសម្ពោធបើកការសាងសង់ផ្លូវថ្មើជើងឡើងតំបន់ខ្នងផ្សារ ចាប់ពីចំណុចជើងភ្នំ ដល់ដំណាក់ដានព្រះ ចំងាយប្រមាណ ៤ គ.ម ដែលក្នុងនោះក្រសួងបរិស្ថានមានគម្រោងរៀបចំកន្លែងសម្រាកជាដំណាក់ៗ ដែលមានដើមឈើហូបផ្លែ និងឈើព្រៃផ្តល់ម្លប់ និងអាចអ្នកទេសចរណ៍បានសម្រាកផង និងអាចទទួលទានផងដែរ ក្នុងនោះគម្រោងរបស់ក្រសួងបរិស្ថាន និងផ្តល់ជូនដល់អ្នកទេសចរឡើងភ្នំខ្នងផ្សារអាចពិសាទឹកស្អាត ដែលចម្រោះចេញពីទឹកធម្មជាតិប្រភពពីលើភ្នំ ដល់កន្លែងសម្រាក ជាមួយការដាក់ស្លាកព័ត៌មានដែលបង្ហាញពីចម្ងាយផ្លូវ និងការបញ្ចេញថាមពលរបស់អ្នកឡើងភ្នំ នៅតាមកន្លែងសម្រាកនីមួយៗឆ្ពោះទៅភ្នំខ្នងផ្សារថែមទៀត។