លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ អមដំណើរដោយលោក វ៉ា ថន អភិបាលខេត្តក្រចេះ បានចុះពិនិត្យស្ថានភាពផ្លូវចំនួន ២ខ្សែ ដែលជាការស្នើសុំរបស់ប្រជាពលរដ្ឋ និងអាជ្ញាធរមូលដ្ឋាន តាមរយៈមន្ទីរអភិវឌ្ឍន៍ជនបទខេត្ត ដើម្បីស្ថាបនាជាផ្លូវក្រាលកៅស៊ូពីរជាន់ DBST ។ក្នុងដំណើរអញ្ចើញចុះពិនិត្យផ្លូវទាំង ២ ខ្សែនេះ ធ្វើឡើងនាថ្ងៃទី០៥ ខែឧសភា ឆ្នាំ២០២៥ នៅក្នុងក្រុងក្រចេះ។ផ្លូវដែលអាជ្ញាធរកំពុងសិក្សាលើកកម្រិតគុណភាពជាផ្លូវកៅស៊ូ ផ្លូវខ្សែទី១ គឺជាផ្លូវក្រាលល្បាយក្រួស មានប្រវែង ៣ ២៤៥ ម៉ែត្រ ស្ថិតនៅក្នុងភូមិស្រែស្តៅ១ សង្កាត់អូរឬស្សី ក្រុងក្រចេះ ដែលបម្រើដល់ការធ្វើដំណើររបស់សិស្សានុសិស្ស ការដឹកជញ្ជូនកសិផល សិប្បកម្ម និងទេសចរណ៍ចេញចូលជាប្រចាំ។ផ្លូវខ្សែទី២ ជាផ្លូវដី និងល្បាយក្រួស មានប្រវែងជាង ៥ ៣០០ ម៉ែត្រ តភា្ជប់ពីភូមិស្រែស្ដៅ១ សង្កាត់អូរឫស្សី ទៅដល់ភូមិរការកណ្ដាល សង្កាត់រការកណ្ដាល ក្រុងក្រចេះ ខេត្តក្រចេះ។បន្ទាប់ពីបានពិនិត្យស្ថានភាពផ្លូវរួចមក លោករដ្ឋមន្ដ្រីបានណែនាំដល់នាយកដ្ឋានផ្លូវលំជនបទ និងមន្ទីរអភិវឌ្ឍន៍ជនបទខេត្ត សហការជាមួយអាជ្ញាធរមូលដ្ឋាន និងមន្ទីរជំនាញជំវិញខេត្ត ធ្វើការសិក្សាបន្ថែមនិងពិនិត្យលទ្ធភាពដាក់ចូលក្នុងគម្រោងផែនការដើម្បីស្ថាបនាលើកកម្រិតគុណភាពផ្លូវទាំងពីរខ្សែនេះ។ លោក ឈឺន រិទ្ធ ចៅសង្កាត់អូរឫស្សី បានឲ្យដឹងថា ផ្លូវទាំង២ខ្សែនេះ គឺជាផ្លូវដ៏សារៈសំខាន់មួយបម្រើដល់ការធ្វើដំណើរ វិស័យទេសចរឆ្ពោះទៅកាន់មណ្ឌលវិបស្សនាជ្រោយថ្ម ការដឹកជញ្ជូនដំណាំកសិកម្ម ជាពិសេសការដឹកជញ្ជូនផលស្រូវ នារដូវប្រមូលផល និងជាការតភ្ជាប់រវាងភូមិស្រែស្ដៅ ក្នុងសង្កាត់អូឫស្សី ទៅភូមិរកាកណ្ដាល ក្នុងសង្កាត់រកាកណ្ដាល ក្នុងក្រុងក្រចេះ កាន់តែងាយស្រួល និងបង្ខិតចម្ងាយធ្វើដំណើរកាន់តែជិតថែមទៀត៕