កិច្ចប្រជុំ ស្តីពីគម្រោងសហការបច្ចេកទេសសុវត្ថិភាពនាវាចម្លង តាមរយៈប្រព័ន្ធវីដេអូពីចម្ងាយ ទីស្ដីការក្រសួង៖ នាព្រឹកថ្ងៃអង្គារ ទី៦ ខែឧសភា ឆ្នាំ២០២៥ ឯកឧត្តម ហេង សុធី អគ្គនាយក នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានអញ្ជើញដឹកនាំកិច្ចប្រជុំតាមរយៈវីដេអូពីចម្ងាយ ជាមួយភាគីចិន ដឹកនាំដោយ ឯកឧត្តម Chen Chuanquan អគ្គនាយក នៃអគ្គនាយកដ្ឋានរដ្ឋបាលសុវត្ថិភាពសមុទ្រខ្វាងតុង ស្តីពីគម្រោងសហការបច្ចេកទេសសុវត្ថិភាពនាវាចម្លង ដោយមានការចូលរួមពីតំណាងនាយកដ្ឋាននាវាជំនួញសមុទ្រ ដឹកជញ្ជូនផ្លូវទឹក រដ្ឋបាលកំពង់ផែ និងហេដ្ឋារចនាសម្ព័ន្ធ និងសំណង់កំពង់ផែ។ កិច្ចប្រជុំនេះរៀបចំឡើងក្នុងគោលបំណងដើម្បីពិភាក្សាលម្អិតលើគម្រោងសំខាន់ ៤ រួមមាន៖ ១)ការទំនាក់ទំនងបន្ទាន់ និងការសង្គ្រោះសម្រាប់នាវាចម្លង ២) សហប្រតិបត្តិការស្តង់ដានាវា ៣) ប្រព័ន្ធចំណតនាវាចម្លងវៃឆ្លាត ៤) ធ្វើជាសហប្រធានក្នុងការរៀបចំវេទិកាថ្នាក់តំបន់អាស៊ានលើកទី៣ស្តីពីការបណ្តុះបណ្តាលសុវត្ថិភាពនាវាចម្លង។ ជាលទ្ធផលអង្គប្រជុំបានឯកភាពក្នុងការបង្កើតក្រុមការងារដែលមានសមាសភាពពីតំណាងនាយកដ្ឋានទាំង៤ រៀបចំផែនការសកម្មភាព និងយន្តការទំនាក់ទំនងឱ្យបានទៀងទាត់ ជាពិសេសផែនការបន្ទាប់ត្រូវរៀបចំលិខិតស្នើសុំគោលការណ៍ ថ្នាក់ដឹកនាំក្រសួង ដើម្បីរៀបចំក្រុមការងារ និងស្នើសុំចុះកិច្ចព្រមព្រៀងកម្រិតអគ្គនាយកដ្ឋានជាមួយភាគីចិន បន្ទាប់ពីសិក្សាលម្អិតពីគម្រោងរួចរាល់៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube