កិច្ចប្រជុំបូកសរុបលទ្ធផលការងារប្រចាំខែមេសា ឆ្នាំ២០២៥ របស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ទីស្ដីការក្រសួង៖ នារសៀលថ្ងៃពុធ ទី២៦ ខែកុម្ភៈ ឆ្នាំ២០២៥ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែមេសា ឆ្នាំ២០២៥ របស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការទទួលបន្ទុក ប្រធាន អនុប្រធាន សមាជិក សមាជិកាលេខាធិការដ្ឋាន និងអនុប្រធានស្ថានីយជញ្ជីងអចល័តទូទាំងប្រទេស និងមន្ត្រីពាក់ព័ន្ធជាច្រើនរូប។ កិច្ចប្រជុំនេះរៀបចំឡើង ក្នុងគោលបំណងដើម្បីបូកសរុបលទ្ធផលប្រចាំខែរបស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ សំដៅពង្រឹងការអនុវត្តការងារត្រួតពិនិត្យយានយន្តនៅតាមស្ថានីយជញ្ជីងនីមួយៗ ព្រមទាំងរៀបចំទិសដៅការងារធ្វើយ៉ាងណាឱ្យការងារដែលកំពុងអនុវត្តកាន់តែមានប្រសិទ្ធភាពថែមទៀត ព្រមទាំងពន្យល់ណែនាំបន្ថែមលើការអនុវត្តតាមលិខិតលេខ២៩១ សជណ.អស ចុះថ្ងៃទី២១ ខែកុម្ភៈ ឆ្នាំ២០២៥ របស់ទីស្តីការគណៈរដ្ឋមន្រ្តី លើសេចក្តីជូនដំណឹង លើការចាត់វិធានការបន្ថែមទៀតទៅលើយានយន្តដឹកជញ្ជូនធុនធ្ងន់ដែលបើកបរលើបណ្តាញផ្លូវថ្នល់ ក្នុងករណីមានអំពើល្មើសលើការផ្ទុកទម្ងន់ ត្រូវពិន័យទាំងការផ្ទុកទម្ងន់សរុប និងការផ្ទុកទម្ងន់នៃភ្លៅទាំង ២ករណី ។ សូមបញ្ជាក់ថា ការពិន័យទម្ងន់លើសតាមភ្លៅ នៃយានយន្តល្មើស មានចែងក្នុងមាត្រា៦០ នៃច្បាប់ស្តីពីផ្លូវថ្នល់ឆ្នាំ២០១៤ មកម្ល៉េះ ប៉ុន្តែដោយសារការអនុវត្តច្បាប់ ត្រូវធ្វើជាជំហានៗ និងមានភាពទន់ភ្លន់ ទើបកន្លងមកពុំបានអនុវត្តពេលលេញតាមបទបញ្ញត្តិនៃច្បាប់កំណត់នៅឡើយ។ ហេតុនេះដើម្បីរឹតបន្តឹងការអនុវត្តច្បាប់ និងឱ្យម្ចាស់យានយន្តដឹកជញ្ជូនធុនធ្ងន់ទាំងអស់រាងចាល ក្រសួងបានសម្រេចបន្ថែមវិធានការពិន័យការផ្ទុកលើសទម្ងន់តាមភ្លៅ ចាប់ពីថ្ងៃទី១៦ ខែមេសា ឆ្នាំ២០២៥ នេះតទៅ។ ស្របពេលជាមួយគ្នានេះ ក្រសួងក៏បាននិងខិតខំជំរុញការងារធ្វើវិសោធនកម្មច្បាប់ស្តីពីផ្លូវថ្នល់ ពិសេស មាត្រា២៦ និងមាត្រា៦០ ដើម្បីឱ្យស្របទៅនឹងស្ថានភាពអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ និងឆ្លើយតបចំពោះការរីកចម្រើនលូតលាស់នៃសេដ្ឋកិច្ចសង្គមជាតិ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube