(បាត់ដំបង)៖ នាព្រឹកថ្ងៃទី១ ខែមេសា ឆ្នាំ២០២៥ សាខាបាទក្រហមកម្ពុជាខេត្តបាត់ដំបង ដែលមានលោក សុខ លូ ប្រធានគណៈកម្មាធិការសាខាខេត្ត បានចាត់ក្រុមប្រតិបត្តិសាខាដឹកនាំដោយលោក យ៉ាន ឧត្តម នាយករងសាខាចូលរួមយុទ្ធនាការស្តីពី «យុវជន និងលើកកម្ពស់សុវត្ថិភាពចរាចរណ៍ផ្លូវគោក» ដែលមានការចូលរួមពីលោក សល់ សុទត្ត អនុប្រធានមន្ទីរសាធារណការ និងដឹកជញ្ជូនខេត្តតំណាងលោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង លោក សើ សាម៉េត អភិបាលស្រុក និងជាប្រធានអនុសាខាកាកបាទក្រហមកម្ពុជាស្រុកសំឡូត លោក កុល បុត្រ ប្រធានក្រុប្រឹក្សាស្រុកកម្លាំង នៃអធិការដ្ឋាននគបាលស្រុកសំឡូត មន្ត្រីប្រតិបត្តិសាខា អនុសាខា និងយុវជនកាកបាទក្រហមកម្ពុជាសរុបចំនួន២៥នាក់។ ក្នុងនាមសាខាកាកបាទក្រហកម្ពុជាខេត្តបាត់ដំបង លោក យ៉ាន ឧត្តម បានបាននាំនូវប្រសាសន៍ផ្តាំផ្ញើសួរសុខទុក្ខ និងក្តីនឹករលឹសំណាក់លោក សុខ លូ ប្រធានគណៈកម្មាធិការសាខាខេត្ត ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងថ្លែងអំណរគុណយ៉ាងជ្រាលជ្រៅជាទីបំផុតចំពោះវត្តមាន លោក លោកស្រី លេខាដ្ឋានអនុគណៈកម្មការសុវត្ថិភាពចរាចរណ៍ផ្លូវគោកខេត្ត មន្រ្តីរាជការនៃរដ្ឋបាលស្រុកសំឡូត កងកម្លាំងនៃអធិការដ្ឋាននគបាលស្រុក ប្អូនៗយុវជនកាកបាទក្រហមកម្ពុជា ដែលបានចំណាយពេលវេលា កម្លាំងកាយ និងឆន្ទៈមុតមកចូលរួមយុទ្ធនាការនាព្រឹកនេះ។ លោកនាយករងសាខាបានបន្តថា «សាខាកាកបាទក្រហមកម្ពុជាខេត្តដែលមានឯកឧត្តម សុខ លូ ជាប្រធានគណៈកម្មាធិការសាខា តែងតែធ្វើយុទ្ធនាការលើកកម្ពស់សុវត្ថិភាពចរាចរណ៍នេះ ជារៀងរាល់ឆ្នាំ ព្រោះកាកបាទក្រហម កម្ពុជា ជាសមាជិកថ្នាក់ជាតិរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក និងដើម្បីឆ្លើយតបទៅនឹងផែនការជាតិទសវត្សរ៍សុវត្ថិភាពចរាចរណ៍ផ្លូវគោកឆ្នាំ២០២១-២០៣០ និងការអំពាវនាវរបស់រាជរដ្ឋាភិបាលកម្ពុជា សូមឱ្យស្ថាប័នពាក់ព័ន្ធរួមគ្នាចូលរួមកាត់បន្ថយអត្រាស្លាប់ របួសធ្ងន់ និងពិការដោយសារគ្រោះថ្នាក់ចរាចរណ៍ក្នុងព្រះរាជាណាចក្រកម្ពុជាតាមតែអាចធ្វើទៅបាន។ គ្រោះថ្នាក់ចរាចរណ៍ជាបញ្ហាប្រឈមចម្បងមួយ បានសំលាប់ប្រជាពលរដ្ឋខ្មែរជាច្រើនពាន់នាក់ក្នុង១ឆ្នាំៗ»។ លោក សល់ សុទត្ត អនុប្រធានមន្ទីរ ក្នុងនាមលោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបងបានគូបញ្ជាក់ថា ដោយសង្កេតឃើញថាគ្រោះថ្នាក់ចរាចរណ៍ផ្លូវគោកហាក់មាន ការកើនឡើងគួរឱ្យព្រួយបារម្ភ ស្របពេលថ្ងៃឈប់សម្រាកក្នុងឱកាស ពិធីចូលឆ្នាំថ្មី ប្រពៃណីជាតិខ្មែរខាងមុខនេះ ទើបសាខាកាកបាទក្រហមកម្ពុជាខេត្តបាត់ដំបង និងលេខាដ្ឋានអនុគណៈកម្មាធិការសុវត្ថិភាពចរាចរណ៍ផ្លូវគោកខេត្តនៃ មន្ទីសាធារណការ និងដឹកជញ្ជូនខេត្តសូមអំពាវនាវដល់សាធារណជនជាអ្នកប្រើប្រាស់ផ្លូវទាំងអស់ សូមមេត្តាខិតខំយកចិត្តទុកដាក់បង្កើនស្មារតីចូល រួមបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោក បើកបរយានយន្តតាមវិធានការ ដូចខាងក្រោម៖ ១-ត្រូវបន្ថយល្បឿនបើកបរតាមច្បាប់កំណត់ និងតាមស្ថានភាពជាក់ស្តែងដូចជា ទីប្រជុំជនសាលារៀន ផ្លូវគ្រលុកផ្លូវកោង ផ្លូវប្រសព្វ ផ្លូវចំណោត ផ្លូវចង្អៀត ឬផ្លូវរអិល។ល។ មូលហេតុចម្បង ដែលបណ្ដាលឱ្យមានគ្រោះថ្នាក់ចរាចរណគឺការបើកបរលឿនហួសល្បឿនកំណត់។២-ត្រូវគោរពសិទ្ធិអាទិភាពនៅត្រង់ផ្លូវប្រសព្វ ដោយត្រូវបើកបរបន្ថយល្បឿន និងត្រូវទុកសិទ្ធិឱ្យ អ្នកបើកបរលើផ្លូដែលមានសិទ្ធិ បានធ្វើចរាចរណ៍ទៅមុន។៣-មុននឹងវ៉ាជែង ត្រូវដឹងច្បាស់ថាផ្លូវខាងមុខទំនេរអាចចជែងបានដោយសុវត្ថិភាព ចៀសវាងការវ៉ាជែងដោយប្រថុយប្រថាន ដែលអាចបង្កឱ្យមានគ្រោះថ្នាក់ចរាចរណ៍ជាយថាហេតុ។៤-ចំពោះរថយន្តដឹកអ្នកដំណើរឬរថយន្តដឹកទំនិញសូមកុំផ្ទុកមនុស្សឬទំនិញលើសច្បាប់កំណត់ ជាពិសេសរថយន្តដឹកអ្នកដំណើរ មិនត្រូវផ្ទុកមនុស្សនៅលើដំបូលនិងមិនត្រូវដំឡើងថ្លៃធ្វើដំណើរក្នុងឱកាសនេះ។៥-ត្រូវត្រួតពិនិត្យលក្ខណៈបច្ចេកទេសយានជំនិះរបស់ខ្លួន មុនពេលធ្វើចរាចរណ៍។៦-អ្នកបើកបររថយន្ត និងអ្នករួមដំណើរ សូមពាក់ខ្សែក្រវាត់សុវត្ថិភាពឱ្យបានត្រឹមត្រូវជាប់ជាប្រចាំ។៧-អ្នកបើកបរម៉ូតូ និងអ្នករួមដំណើរទាំងអស់ ត្រូវពាក់មួកសុវត្ថិភាពឱ្យបានត្រឹមត្រូវគ្រប់ៗគ្ន ទោះធ្វើ ដំណើរជិត ឬឆ្ងាយនិងគ្រប់ពេលវេលា។ ត្រូវចងចាំជានិច្ចថា «មួកសុវត្ថិភាពមួយ អាចជួយការពារនូវ ការរងរបួសក្បាល ឬអាចការពារជីវិតបាន»។៨- មិនត្រូវបើកបរក្រោមឥទ្ធិពលនៃជាតិស្រវឹង ឬសារធាតុញៀន និងសូមចងចាំជានិច្ចនូវពាក្យស្លោក «បើពិសាគ្រឿងស្រវឹង បើកបរ ស្ថានភាពស្រវឹងនឹងបង្កឱ្យអ្នកបើកបរបាត់ការចងចាំ វង្វេងស្មារតីមិនអាចបញ្ជាយានបានដោយ សុវត្ថិភាពងាយប្រឈមនឹងការបង្កគ្រោះថ្នាក់ចរាចរណ៍»។៩-នៅពេលបើកបរ ត្រូវប្រកាន់ខ្ជាប់នូវសុជីវធម៌ សីលធម៌ និងការអធ្យាស្រ័យគ្នាទៅវិញទៅមកដើម្បីបញ្ចៀសគ្រោះថ្នាក់ ឬការកកស្ទះចរាចរណ៍ ដើម្បីចៀសវាងពីការប្រឈមចំពោះផ្លូវច្បាប់ សូមបងប្អូនគោរពអនុវត្តច្បាប់ ស្តីពីចរាចរណ៍ផ្លូវគោកឱ្យបានខ្ជាប់ខ្លួន ដើម្បីការពារអាយុជីវិតខ្លួនឯងផ្ទាល់ដើម្បីភាពសុខដុមរម្យនា ក្នុងក្រុមគ្រួសារ ដើម្បីការពារទ្រព្យសម្បត្តិរបស់បងប្អូន និងដើម្បីរួមគ្នាលើកកម្ពស់កិត្តិយស សេចក្តីថ្លៃថ្នូររបស់ប្រទេសជាតិយើង។ លោក សើ សាម៉េត អភិបាលស្រុកបានថ្លែងបញ្ចាក់ថា ក្នុងឆ្នាំ២០២៤កន្លងទៅនេះ រដ្ឋបាលស្រុកបានអនុវត្តគោនយោបាយភូមិឃុំសង្កាត់មានសុវត្តិភាព គណៈបញ្ជាការឯកភាពស្រុកតែងតែយកចិត្តទុកដាក់ ពីសុវត្ថិភាព សេចក្តីសុខប្រជាពលរដ្ឋជាចំបង ក្នុងនោះបានចាត់ក្រុមការងារចុះផ្សព្វផ្សាយគោលនយោបាល ពិសេសច្បាប់ចរាចរណ៍ជាប្រចាំផង ដែលលោកអភិបាលស្រុកបានងថ្លែងអំណរគុណយ៉ាងជ្រាលជ្រៅចំពោះ សាខាកាកបាទក្រហមកម្ពុជាខេត្ត មន្ទីរសាធារណៈការនិងដឹកជញ្ជូនខេត្ត និងមន្ត្រីសុវត្ថិភាពចរាចរណ៍ ក្មួយៗយុវជនកាកបាទក្រហមកម្ពុជា ដែលតែងតែយកចិត្តទុកដាក់ក្នុងការចូលរួមអនុវត្តច្បាប់ពីចរាចរណ៍ផ្លូវគោក ក៏ដូចជាចូលរួមក្នុងការអប់រំផ្សព្វផ្សាយ និងលើកទឹកចិត្តដល់បងប្អូនប្រជាពលរដ្ឋយើងឱ្យចូលរួមលើកកម្ពស់ និងពង្រឹងការអនុវត្តច្បាប់នៅក្នុងព្រះរាជាណាចក្រកម្ពុជាយើង ជាពិសេសក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៥នេះ។ យុទ្ធនាការនេះក្រុមការងារបានផ្សព្វផ្សាយ ចែកខិតបណ្ណ័ ដល់ប្រជាពលរដ្ឋដែលធ្វើដំណើតាមដងផ្លូវចំនួន ៧៥០នាក់/ស្រី២២៤នាក់, ចែកជូនឯកសារសុវត្ថិភាពចរាចរណ៍ផ្លូវគោករួមមាន៖ មួកសុវត្ថិភាព ២០មួក, សៀវភៅច្បាប់ចរាចរណ៍ផ្លូវគោក៦០ក្បាល, សៀវភៅម៉ូតូ អ្វីដែលអ្នកបើកបរទោចក្រយានយន្តត្រូវយល់ដឹង៤០០ក្បាល,ខិតប័ណ្ណ សុវត្ថិភាពក្នុងការបើក បរយានយន្ត៣០០ច្បាប់,ឯកសារជំនួយស្មារតី ស្តីពីច្បាប់ចរាចរណ៍ផ្លូវគោក ប្រការសំខាន់ៗ ដែលត្រូវចងចាំចំពោះអ្នកប្រើប្រាស់ផ្លូវ ៣០០ច្បាប់,សៀវភៅបត់ផ្លាកសញ្ញាចរាចរណ៍សំខាន់ៗ០២ក្បាល,ផ្ទាំងសញ្ញាថ្មើរជើង ៥០ផ្ទាំង,ផ្ទាំងសិទ្ធអាទិភាព ៥០ផ្ទាំង,សីលធម៌ ១០ ចំនុច៥០បន្ទះ,ស្ទីកឃ័រចំណាំងផ្លាត M3៨០០បន្ទះ, ផ្ទាំងសញ្ញាចរាចរណ៍សំខាន់ៗ០៩ផ្ទាំង។ សូមបញ្ជាក់ថា យុទ្ធនាការលើកកម្ពស់សុវត្ថិភាពចរាចណ៍ក្រុមការងារ បានចែកជូនប្រជាពលរដ្ឋ សំណួរចម្លើយយកមួកសុវត្ថិភាពផងដែរ៕