ពិធីបើកសិក្ខាសាលាស្តីពីការពង្រឹងសមត្ថភាពលើសេវាកម្មអនាម័យសម្រាប់ទាំងអស់គ្នានៅក្នុងទីក្រុង (CWIS) តាមបណ្តាខេត្តគោលដៅ ក្រោមក្របខ័ណ្ឌ គម្រោងការពន្លឿនការផ្គត់ផ្គង់ទឹកស្អាត និងអនាម័យ ក្រោមឥណទានសម្បទានរបស់ធនាគារពិភពលោក (WB) សៀមរាប៖ នាព្រឹកថ្ងៃចន្ទ ថ្ងៃទី២៤ ខែមីនា ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញជាអធិបតីភាពក្នុងពិធីបើកសិក្ខាសាលាស្តីពីការពង្រឹងសមត្ថភាពលើសេវាកម្មអនាម័យសម្រាប់ ទាំងអស់គ្នានៅក្នុងទីក្រុង (CWIS) តាមបណ្តាខេត្តគោលដៅ ក្រោមក្របខ័ណ្ឌ គម្រោងការពន្លឿនការផ្គត់ផ្គង់ទឹកស្អាត និងអនាម័យ ក្រោមឥណទានសម្បទានរបស់ធនាគារពិភពលោក (WB) ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ ឯកឧត្តមអគ្គនាយក តំណាងធនាគារពិភពលោក លោក-លោកស្រី ដែលជាតំណាងមន្ទីរសាធារណការ និងដឹកជញ្ជូន រាជធានី/ខេត្ត តំណាងមន្ទីរបរិស្ថាន តំណាងរដ្ឋាករទឹកស្វយ័ត តំណាងរដ្ឋបាលក្រុង និងអង្គភាពពាក់ព័ន្ធ។ សិក្ខាសាលានេះធ្វើឡើងក្នុងគោលបំណង ដើម្បីពង្រឹងសមត្ថភាពការផ្ដល់សេវាកម្ម និងស្វែងយល់អំពីសេវាកម្មអនាម័យសម្រាប់ទាំងអស់គ្នានៅក្នុងទីក្រុង (CWIS) ដែលជាវិធីសាស្ត្រមួយដើម្បីធានាបាននូវ មនុស្សគ្រប់គ្នានៅក្នុងទីក្រុងមានលទ្ធភាព ទទួលបានសេវាកម្មអនាម័យ និងត្រូវបានគ្រប់គ្រងប្រកបដោយសុវត្ថិភាព តាមរយៈការប្រើប្រាស់នូវ ដំណោះស្រាយជាច្រើនដូចជា ប្រព័ន្ធអនាម័យនៅនឹងប្រភព និងប្រព័ន្ធអនាម័យតាមប្រព័ន្ធលូ ស្របទៅតាមស្ថានភាពជាក់ស្តែងនៃទីក្រុងនីមួយៗ។ ថ្លែងក្នុងឱកាសនេះ ឯកឧត្តមរដ្ឋលេខាធិការ បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះធនាគារពិភពលោក ដែលជាដៃគូសហការដ៏សំខាន់មួយរបស់រាជរដ្ឋាភិបាលកម្ពុជា និងបានចូលរួមយ៉ាងសកម្មក្នុងការគាំទ្រដល់ក្រសួងសាធារណការ និងដឹកជញ្ជូន ក្នុងការផ្តល់ហិរញ្ញប្បទានសម្រាប់ការអភិវឌ្ឍលើវិស័យផ្គត់ផ្គង់ទឹកស្អាត និងអនាម័យក្នុងបណ្តាខេត្តអាទិភាពមួយចំនួនតាមរយៈគម្រោងខាងលើនេះ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube