បន្លែស្ពៃក្តោប ក្លាយជាដំណាំសម្គាល់ភូមិសាស្ត្រខេត្តមណ្ឌលគិរី មានទីផ្សារល្អ និងតម្លៃសមរម្យ ស្ពៃក្តោបជាដំណាំបន្លែមួយប្រភេទក្នុងចំណោមបន្លែល្បីៗប្រចាំខេត្តមណ្ឌលគិរី។ បន្លែផ្សេងៗទៀត រួមមានដូចជា៖ ការ៉ុត ដំឡូងបារាំង ខ្ទឹមបារាំង ស្ពៃបូកគោ ខាត់ណា ដែលប្រជាកសិករក្នុងខេត្តមណ្ឌលគិរី និយមចូលចិត្តដាំ ដ្បិតមានទីផ្សារល្អ និងតម្លៃសមរម្យ អាចបង្កើនជីវភាពពួកគាត់ឱ្យបានល្អប្រសើរ។ បន្លៃស្ពៃក្តោបក្នុងខេត្តមណ្ឌលគិរី ហាក់បីដូចជាមានរសជាតិផ្អែមស្រួយ ខុសពីតំបន់ដទៃៗទៀតក្នុងប្រទេសកម្ពុជា ដោយសារកត្តាដីមានជីវជាតិ អាកាសធាតុអំណោយផល ប្រភពទឹកគ្រប់គ្រាន់ និងបច្ចេកទេសដាំដុះត្រឹមត្រូវ រហូតដល់មហាជនលាន់មាត់ថា បើទៅលេងខេត្តមណ្ឌលគិរីហើយ មិនបានសាកទទួលទានស្ពៃក្តោប ដែលដាំដុះផ្ទាល់នៅទីនោះ ហាក់ដូចមិនបានទៅលេងមណ្ឌលគិរី អីចឹង៕