សិក្ខាសាលាផ្សព្វផ្សាយ-បណ្តុះបណ្តាល ស្តីពី “បច្ចេកវិទ្យា និងផលិតផលប្រទេសជប៉ុន” ដើម្បីពង្រឹងសមត្ថភាពក្នុងការងារសាងសង់ហេដ្ឋារចនាសម្ព័ន្ធផ្លូវថ្នល់ រាជធានីភ្នំពេញ៖ នាថ្ងៃចន្ទ ទី២៤ ខែកុម្ភៈ ឆ្នាំ២០២៥ លោក ឈឹម ផល្លា ប្រធាននាយកដ្ឋានផ្លូវថ្នល់ តំណាងឯកឧត្តម ហ៊ាង វុត្ថា អគ្គនាយកនៃអគ្គនាយកដ្ឋានបច្ចេកទេស ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងសិក្ខាសាលាផ្សព្វផ្សាយ-បណ្តុះបណ្តាល ស្តីពី “បច្ចេកវិទ្យា និងផលិតផលប្រទេសជប៉ុន” ដោយមានការអញ្ជើញចូលរួមពី លោក Tananori Kuribayashi តំណាងស្ថានទូតជប៉ុនប្រចាំកម្ពុជា លោក Hiroshi Anzo តំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) តំណាងក្រុមហ៊ុន Omura Concrete តំណាងក្រុមហ៊ុន IKE តំណាងក្រុមហ៊ុន Tanaka តំណាងក្រុមហ៊ុន Skymatix លោក-លោកស្រីជាថ្នាក់ដឹកនាំ និងមន្ត្រីរាជការ នៃក្រសួងសាធារណការ និងដឹកជញ្ជូន រួមជាមួយតំណាងមន្ទីរសាធារណការនិងដឹកជញ្ជូនរាជធានី-ខេត្ត តំណាងក្រសួងធនធានទឹក និងឧតុនិយម តំណាងក្រសួងរៀបចំដែនដី នគរូបនីយកម្ម និងសំណង់ និងតំណាងពីក្រុមហ៊ុនឯកជនជាច្រើនរូបផងដែរ។ សិក្ខាសាលាផ្សព្វផ្សាយ-បណ្តុះបណ្តាលនេះ ត្រូវបានរៀបចំឡើងដោយក្រសួងសាធារណការ និងដឹកជញ្ជូន សហការជាមួយក្រុមហ៊ុន Omura Concrete ក្រុមហ៊ុន IKEE ក្រុមហ៊ុន Tanaka ក្រុមហ៊ុន Skymatix ក្នុងគោលបំណងផ្សព្វផ្សាយ និងពង្រឹងសមត្ថភាពថែមជូនដល់មន្រ្តីបច្ចេកទេសរបស់ក្រសួង-ស្ថាប័នពាក់ព័ន្ធ និងផ្នែកឯកជន ឱ្យយល់ដឹងពីបច្ចេកវិទ្យា និងផលិតផលនានារបស់ប្រទេសជប៉ុន ដែលមានសក្តានុពលក្នុងការរួមចំណែកអភិវឌ្ឍដល់ការងារសាងសង់ និងថែទាំផ្លូវថ្នល់ ការពារការបាក់ប្រាំង និងសំណង់ហេដ្ឋារចនាសម្ព័ន្ធនានាប្រកបដោយប្រសិទ្ធភាព និងទាន់ពេលវេលា។ ថ្លែងក្នុងពិធីសិក្ខាសាលានេះ លោកប្រធាននាយកដ្ឋានផ្លូវថ្នល់ បានបញ្ជាក់ថាការរៀបចំសិក្ខាសាលានេះត្រូវបានគិតគូរ និងពិភាក្សាយ៉ាងល្អិតល្អន់ រវាងក្រុមការងារក្រសួងសាធារណការ និងដឹកជញ្ជូន និងក្រុមហ៊ុនទាំង៤ ដើម្បីរៀបចំជូនសិក្ខាកាម និងបានសម្តែងនូវភាពរីករាយ និងផ្តាំផ្ញើជូនចំពោះសិក្ខាកាមចូលរួមទាំងអស់ ត្រូវខិតខំយកចិត្តទុកដាក់ខ្ពស់ ដើម្បីទទួលបានចំណេះដឹងពីវគ្គបណ្តុះបណ្តាលនេះ ដែលជាផ្នែកមួយដ៏សំខាន់ក្នុងការអភិវឌ្ឍចំណេះដឹងរបស់ខ្លួន និងស្ថាប័ន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube