ភ្នំពេញ៖ ការដឹកជញ្ជូនទំនិញឆ្លងកាត់តាមកំពង់ផែស្វយ័តទាំង២របស់កម្ពុជា គឺកំពង់ផែស្វយ័ត ក្រុងព្រះសីហនុ និងភ្នំពេញ សម្រេចបានក្នុងបរិមាណជាង១៤លានតោន ដោយទទួលចំណូលបានប្រមាណ១៥៣លានដុល្លារ ក្នុងឆ្នាំ២០២៤។ តួលេខនេះ ត្រូវបានលើកឡើងដោយ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ក្នុងពិធីបើកសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ នាថ្ងៃទី២២ ខែមករា ។បើតាមលោក ប៉េង ពោធិ៍នា ពេញមួយឆ្នាំ២០២៤កន្លងមកនេះ កំពង់ផែស្វយ័តក្រុងព្រះសីហនុ សម្រេចលើការដឹកជញ្ជូនទំនិញនាំចូល-នាំចេញបានចំនួន ៩,៦០លានតោន។ ចំនួនដឹកជញ្ជូនទំនិញតាមកំពង់ផែនេះ មានទំហំទឹកប្រាក់១១០,៣៨ លានដុល្លារ កើន២៤,១២ ភាគរយ បើធៀបឆ្នាំ២០២៣ ដែលមានចំនួន៨៨,៩៤ លានដុល្លារ។ ជាមួយគ្នានេះ កំពង់ផែស្វយ័តភ្នំពេញ សម្រេចការដឹកជញ្ជូនទំនិញនាំចូល-នាំចេញបាន៤,៥១លានតោន ដែលមានទឹកប្រាក់ ៤៣,៤៥ លានដុល្លារ។ លោករដ្ឋមន្ត្រីក្រសួងសាធារណការ បានបញ្ជាក់ថា ចំនួនទឹកប្រាក់នេះ មានកំណើន១៦,៦០ ភាគរយ យើងធៀបកាលពីឆ្នាំ២០២៣ មានចំនួន ៣៧,២៧ លានដុល្លារ។ ដើម្បីជំរុញការដឹកជញ្ជូនតាមផ្លូវទឹកនេះឱ្យកាន់តែប្រសិទ្ធភាព លោក ប៉េង ពោធិ៍នា បានកំណត់នូវចក្ខុវិស័យសំខាន់ចំនួនពីរ។ ចំណុចសំខាន់ទី១. គឺជាការលើកកម្ពស់សេវាដឹកជញ្ជូន តាមរយៈការអភិវឌ្ឍ និងបន្តធ្វើទំនើបកម្មការប្រើប្រាស់បច្ចេកវិទ្យាឌីជីថលក្នុងការគ្រប់គ្រង និងការផ្តល់សេវាលឿន រហ័ស តម្លាភាព ប្រសិទ្ធភាព ងាយស្រួល និងជឿទុកចិត្ត។ ចំពោះចំណុចសំខាន់ទី២ ជាការលើកកម្ពស់ការតភ្ជាប់ប្រព័ន្ធដឹកជញ្ជូនអន្តរមធ្យោបាយ ឡូជីស្ទីក និងការអភិវឌ្ឍហេដ្ឋារចនាសម្ព័ន្ធដឹកជញ្ជូនឱ្យមានគុណភាព សុវត្ថិភាព ចីរភាព ភាពធន់ និងបរិយាបន្ន។ ដើម្បីសម្រេចចក្ខុវិស័យទាំងពីរនេះ លោក ប៉េង ពោធិ៍នា បានដាក់ចេញនូវវិធានការគន្លឹះសំខាន់ៗ ក្នុងការកែលម្អ និងអភិវឌ្ឍន៍ប្រព័ន្ធដឹកជញ្ជូនទាំងផ្លូវគោក ផ្លូវដែក និងផ្លូវទឹក។ ជាពិសេសផ្តោតលើការពង្រឹងគុណភាពហេដ្ឋារចនាសម្ព័ន្ធដឹកជញ្ជូន និងការតម្រង់ទិសឆ្ពោះទៅរកការអភិវឌ្ឍប្រព័ន្ធដឹកជញ្ជូនអន្តរមធ្យោបាយ ដែលមានភាពប្រទាក់ក្រឡា ប្រសិទ្ធភាពសេដ្ឋកិច្ច និងសុវត្ថិភាព ដើម្បីកាត់បន្ថយពេលវេលា និងចំណាយក្នុងការធ្វើដំណើរ និងការដឹកជញ្ជូនទំនិញ។ លើសពីនេះ លោករដ្ឋមន្ត្រីក្រសួងសាធារណការ ក៏បានជំរុញការរៀបចំច្បាប់ គោលនយោបាយ លិខិតបទដ្ឋានគតិយុត្ត និងបទដ្ឋានបច្ចេកទេសដើម្បីពង្រឹងប្រសិទ្ធភាពនៃការគ្រប់គ្រងក្នុងវិស័យសាធារណការ និងដឹកជញ្ជូនផងដែរ។ សូមជម្រាបថា កាលឆ្នាំ២០២៤ ក្រសួងសាធារណការ បានផ្ដល់សេវាចុះបញ្ជីចំពោះនាវាផ្លូវទឹកចំនួន ២៦ គ្រឿង និងនាវាសមុទ្រចំនួន ១០ គ្រឿង។ ក្នុងនោះ រដ្ឋទទួលបានចំណូលពីការផ្ដល់សេវាដឹកជញ្ជូនតាមផ្លូវទឹក ផ្លូវសមុទ្រ និងកំពង់ផែប្រមាណ ២ ២៨១ លានរៀល (ជិត ៥៧ ម៉ឺនដុល្លារ) កើនឡើង ៣,៨៧ ភាគរយ ធៀបនឹងឆ្នាំ២០២៣ ចំនួន ២ ១៩៦ លានរៀល (ជាង ៥៤ ម៉ឺនដុល្លារ)៕