ក្រសួងសាធារណការព្រមានចុះបិទយានដ្ឋានជួសជុល និងកែច្នែដំឡើងយានយន្តដែលគ្មានលិខិតអនុញ្ញាតធ្វើអាជីវកម្មទាំងអស់ចាប់ពីថ្ងៃទី៣០ ខែមិថុនា ឆ្នាំ២០២៥តទៅ។ ក្នុងសេចក្ដីជូនដំណឹងចុះថ្ងៃទី២ ខែមករា ឆ្នាំ២០២៥ ក្រសួងសាធារណការបានទុកពេលត្រឹមថ្ងៃទី៣០ ខែមិថុនា ដើម្បីឱ្យម្ចាសយានដ្ឋានទាំងអស់នៅកម្ពុជាទៅដាក់ពាក្យស្នើសុំចុះបញ្ជី និងលិខិតអនុញ្ញាតឱ្យធ្វើអាជីវកម្មយានដ្ឋាន។ ក្រសួងបញ្ជាក់ថា៖ «ផុតឱសានវាទនេះ ក្រសួងសាធារណការ និងដឹកជញ្ជូន នឹងផ្អាកជាបណ្ដោះអាសន្ននូវការទទួលពាក្យស្នើសុំចុះបញ្ជីយានដ្ឋានកែច្នៃដំឡើងរថយន្ត និងចាត់វិធានការចុះបិទទីតាំងដែលគ្មានលិខិតអនុញ្ញាតធ្វើអាជីវកម្មយានដ្ឋាន»។អនុក្រឹត្យស្ដីពីការគ្រប់គ្រងយានដ្ឋានជួសជុល និងយានដ្ឋានកែច្នែដំឡើងយានយន្តឆ្នាំ២០០៨ បានផ្ដល់សិទ្ធិដល់ក្រសួងសាធារណការ មានសមត្ថកិច្ចក្នុងការគ្រប់គ្រងចុះបញ្ជី និងផ្ដល់លិខិតអនុញ្ញាតឱ្យធ្វើអាជីវកម្មយានដ្ឋានជួសជុល និងកែច្នៃតំឡើងយានយន្តនៅកម្ពុជា។ ជនជាតិខ្មែរ ឬជនបរទេសជារូបវន្តបុគ្គល ឬនីតិបុគ្គល ដែលធ្វើអាជីវកម្មយានដ្ឋានជួសជុល ឬយានដ្ឋានកែច្នៃដំឡើងយានយន្ត ត្រូវគោរពតាមច្បាប់ និងបទបញ្ញាតិ្តនានារបស់ព្រះរាជាណាចក្រកម្ពុជា៕