ចុះពិនិត្យ និងសិក្សាទីតាំងសម្រាប់សាងសង់ស្ថានីយថ្លឹងយានយន្តដឹកជញ្ជូនលើសទម្ងន់កម្រិតកំណត់ នៅលើផ្លូវជាតិលេខ៧ ក្នុងខេត្តកំពង់ចាម នៅព្រឹកថ្ងៃអង្គារ ទី២៤ ខែធ្នូ ឆ្នាំ២០២៤ ឯកឧត្តម សេង ឈួន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្រ្តៃយ៍ បានដឹកនាំគណៈប្រតិភូ ចុះពិនិត្យ និងសិក្សាទីតាំងសម្រាប់សាងសង់ស្ថានីយថ្លឹងយានយន្តដឹកជញ្ជូនលើសទម្ងន់កម្រិតកំណត់ ចំនួន ០១ទីតាំង នៅតាមបណ្តោយផ្លូវជាតិលេខ៧ ចំណុចគីឡូម៉ែត្រលេខ ៣៧+៥៤០ ភូមិត្រកួន ឃុំក្រឡា ស្រុកកំពង់សៀម ខេត្តកំពង់ចាម និងមានការអញ្ជើញចូលរួមពីឯកឧត្តម សា ស៊ីថា អភិបាលរងខេត្តកំពង់ចាម លោកអភិបាលរងស្រុក ក្រុមប្រឹក្សាឃុំ អនុប្រធានមន្ទីរសាធារណការ និងដឹកជញ្ជូនខេត្តកំពង់ចាម អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពង់ចាម អាជ្ញាធរមូលដ្ឋាន តំណាងក្រុមហ៊ុនសាជីវកម្មស្ពាន និងថ្នល់ចិន(CRBC) និងអង្គភាពពាក់ព័ន្ធ។ ទីតាំងខាងលើនេះ គឺស្ថិតក្នុងផែនការដាក់បន្ថែមទីតាំងស្ថានីយថ្លឹងយានយន្ត សម្រាប់ឆ្នាំ២០២៤-២០២៧ ដែលបានរៀបចំដោយគណៈកម្មការចំពោះកិច្ចដោះស្រាយបញ្ហាប្រឈមពាក់ព័ន្ធនឹងការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់។ ជាលទ្ធផលក្រុមការងារ បានឯកភាពកំណត់យកទីតាំងខាងលើ សម្រាប់សាងសង់ស្ថានីយថ្លឹងយានយន្ត ក្នុងពេលឆាប់ៗខាងមុខនេះ ដើម្បីចូលរួមទប់ស្កាត់ការដឹកជញ្ជូនលើសទម្ងន់កម្រិតកំណត់ និងរួមចំណែកការពារសមិទ្ធផលផ្លូវជាតិលេខ៧ ក្រោយពេលបានពង្រីក និងលើកកម្រិតគុណភាពផ្លូវរួចរាល់៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube