ពិធីសម្ពោធទីលានទុកដាក់សំរាមក្រុងកំពង់ចាម ដែលជាគម្រោងអភិវឌ្ឍន៍ក្រុងរបៀងមហាអនុតំបន់ទន្លេមេគង្គជំហានទី៤ ក្រោមកម្ចីឥណទានសម្បទានពីធនាគារអភិវឌ្ឍន៍អាស៊ី(ADB) កំពង់ចាម ៖ នាព្រឹកថ្ងៃអង្គារ ៩រោច ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៤ ខែធ្នូ ឆ្នាំ២០២៤ ឯកឧត្តម រស់ វណ្ណា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងឯកឧត្តម អ៊ុក ចាន់ដា អភិបាលនៃគណ:អភិបាលខេត្តកំពង់ចាម បានអញ្ជើញចូលរួមជាអធិបតីក្នុងពិធីសម្ពោធទីលានទុកដាក់សំរាមក្រុងកំពង់ចាម ដែលជាគម្រោងអភិវឌ្ឍន៍ក្រុងរបៀងមហាអនុតំបន់ទន្លេមេគង្គជំហានទី៤ ក្រោមកម្ចីឥណទានសម្បទានពីធនាគារអភិវឌ្ឍន៍អាស៊ី(ADB)។ ក្នុងពិធីសម្ពោធនេះក៏បានការអញ្ជើញចូលរួមពី លោកស្រី យូសាណា វ៉ាម៉ា នាយិកាធនាគារអភិវឌ្ឍន៍អាស៊ី(ADB) ថ្នាក់ដឹកនាំ និងមន្ត្រីក្រសួងសាធារណការ និងដឹកជញ្ជូន មន្ទីរ-ស្ថាប័នពាក់ព័ន្ធជុំវិញខេត្ត សិស្សានុសិស្ស និងប្រជាពលរដ្ឋ ប្រមាណជាង៨០០នាក់។ សូមបញ្ជាក់ផងដែរថា អនុគម្រោងសាងសង់ទីលានទុកដាក់សំរាមនៃគម្រោងអភិវឌ្ឍន៍ក្រុងរបៀង៤ប្រើប្រាស់រយ:ពេលសាងសង់ចំនួន១១ខែ ដោយក្រុមហ៊ុន BM Construction & Electric Co.,Ltd ដែលមានទីតាំងស្ថិតក្នុងភូមិកោះរកា ឃុំកោះរកា ស្រុកកំពង់សៀម ខេត្តកំពង់ចាម ដែលគម្រោងទាំងមូលត្រូវបានសាងសង់ឡើងនៅលើផ្ទៃដីសរុបទំហំ ១៨,៦៨ហិកតា ដែលនឹងគ្រោងឱ្យប្រើប្រាស់ដំណាក់កាលដំបូងសម្រាប់រណ្តៅទី១ ក្នុងរយ:ពេល៧ឆ្នាំ(២០២៤-២០៣១) សម្រាប់ប្រជាជនក្នុងក្រុងកំពង់ចាម និងស្រុកដែលនៅក្បែរទីលាននេះ។ តាមការរំពឹងទុក ប្រជាជនប្រមាណ៨៥%ដែលត្រូវជា ៩០៨,០០០នាក់នឹងទទួលបានសេវាកម្មនេះរួមមានសង្កាត់បឹងកុក សង្កាត់កំពង់ចាម សង្កាត់សំបួរមាស សង្កាត់វាលវង់ ស្ថិតនៅក្រុងកំពង់ចាម ឃុំអំពិល និងឃុំខែលជ័យ ស្ថិតនៅស្រុកកំពង់សៀម៕