ពិធីសំណេះសំណាលជាមួយសិស្សនិទ្ទេស A.B.C នៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៤ មណ្ឌលគិរី៖ នារសៀលថ្ងៃព្រហស្បតិ៍ ទី១៩ ខែធ្នូ ឆ្នាំ២០២៤ ឯកឧត្តម ឈួន វិន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានអញ្ជើញជាអធិបតីក្នុងពិធីសំណេះសំណាលជាមួយសិស្សនិទ្ទេស A.B.C នៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៤ ដោយមានការចូលរួមពី ឯកឧត្តម ម៉ែន ង៉ុយ ប្រធានក្រុមប្រឹក្សាខេត្តមណ្ឌលគិរី ឯកឧត្តម ថង សាវុន អភិបាលនៃគណៈអភិបាលខេត្ត និងជាអនុប្រធានអចិន្រ្តៃយ៍ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ឯកឧត្តម លោកជំទាវ ឧកញ៉ា លោក លោកស្រី មាតាបិតាសិស្ស លោកគ្រូ អ្នកគ្រូ និងក្មួយៗសិស្សានុសិស្សជាច្រើនរូប។ ថ្លែងក្នុងអង្គពិធី ឯកឧត្តមប្រធានក្រុមការងារបានសម្តែងក្តីសោមនស្សរីករាយ និងមានមោទនភាពចំពោះការប្រឹងប្រែងរៀនសូត្ររបស់ប្អូនៗសិស្សានុសិស្សដែលបានប្រឡងជាប់ ជាមួយនឹងស្មារតីក្លាហាន ការប្តេជ្ញាចិត្ត និងកសាងផ្លូវដើរទៅមុខបន្ត ដោយមានផែនការច្បាស់លាស់ ក៏ដូចជាចូលរួមត្រេកអរជាមួយឳពុកម្តាយអាណាព្យាបាល លោកគ្រូ អ្នកគ្រូ ទាំងអស់ ដែលខិតខំបង្រៀន និងជួយទំនុកបម្រុងដល់ក្មួយៗរហូតទទួលបានលទ្ធផលល្អត្រចះត្រចង់ក្នុងការសិក្សា។ ក្នុងឱកាសនៃពិធីសំណេះសំណាលនេះ ឯកឧត្តមប្រធានក្រុមការងារ បានផ្តល់រង្វាន់ជូនសិស្សនិទ្ទេសA ចំនួន ០៣នាក់ ស្រី ០១នាក់, និទ្ទេសB ចំនួន ៤៩នាក់ ស្រី ៣៩នាក់ និង និទ្ទេសC ចំនួន ១៨៥នាក់ ស្រី ១០៧នាក់ និងជូនអំណោយដល់ លោកគ្រូ អ្នកគ្រូ ចំនួន ៣០នាក់ផងដែរ។ ឯកឧត្តមប្រធានក្រុមការងារ បានគូសរំលេចពីការខំប្រឹងរបស់រាជរដ្ឋាភិបាលដែលបានយកចិត្តទុកដាក់ និងដាក់ចេញនូវកម្មវិធីផ្សេងៗលើកកម្ពស់គុណភាពអប់រំ ដោយផ្តោតលើការពង្រឹងគុណភាពនៅតាមសាលារដ្ឋ ចាប់ពីថ្នាក់មត្តេយ្យ ដល់មធ្យមសិក្សា តាមរយៈវិធានការចំនួន៤ រួមមាន : ទី១) ការពង្រឹងអភិបាលកិច្ច ទី២) ការពិនិត្យកែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សា ឱ្យស្របទៅតាមតម្រូវការក្នុងការពង្រឹង ចំណេះដឹង វិន័យ សីលធម៌ និងឥរិយាបថរបស់សិស្ស ទី៣) ការយកចិត្តទុកលើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន និងទី៤) ការជំរុញ និងលើកទឹកចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ ក្នុងការអប់រំស្របតាមពាក្យ ស្លោក «ភាពជាដៃគូរដ្ឋ និងសហគមន៍ ដើម្បីការអប់រំ»។ ជាចុងក្រោយ ឯកឧត្តមប្រធានក្រុមការងារបានសម្តែងនូវការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់មន្ទីរអប់រំ យុវជន និងកីឡា លោកគ្រូ អ្នកគ្រូ ក្មួយៗជាយុវជនទាំងអស់ ដែលបានបំពេញភាកិច្ចដោយការទទួលខុសត្រូវខ្ពស់ និងទទួលបានលទ្ធផលជាផ្លែផ្កានាពេលនេះ ព្រមទាំងប្រសិទ្ធពរជ័យជូន ឯកឧត្តម លោកជំទាវ លោកគ្រូ អ្នកគ្រូ ក្មួយៗជាយុវជនទាំងអស់ មានសុខភាពល្អបរិបូរណ៍ សុភមង្គលក្នុងក្រុមគ្រួសារ និងសម្រេចបាននូវជោគជ័យក្នុងគ្រប់កិច្ចការងារ និងការសិក្សាបន្តទៀត៕