កិច្ចប្រជុំគណៈកម្មការអន្តរក្រសួង ដើម្បីតាមដាន និងត្រួតពិនិត្យបច្ចេកទេស និងគុណភាពនៃការជួសជុល និងថែទាំផ្លូវរបស់ក្រុមហ៊ុន គ្លូប៊ល ហ្គ្រីន (ខេមបូឌា) អេនើជី ឌីវេឡុបមេន ឯ.ក ទីស្តីការក្រសួង៖ នាព្រឹកថ្ងៃពុធ ទី១៨ ខែធ្នូ ឆ្នាំ២០២៤ ឯកឧត្តម យិត បុណ្ណា រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មការអន្តរក្រសួង ដើម្បីតាមដាន និងត្រួតពិនិត្យបច្ចេកទេស និងគុណភាពនៃការជួសជុល និងថែទាំផ្លូវរបស់ក្រុមហ៊ុន គ្លូប៊ល ហ្គ្រីន (ខេមបូឌា) អេនើជី ឌីវេឡុបមេន ឯ.ក បានអញ្ជើញជាអធិបតីភាពដឹកកិច្ចប្រជុំលើកដំបូងរបស់គណៈកម្មការអន្តរក្រសួង ដោយមានការអញ្ជើញចូលរួមពី ឯកឧត្តមរដ្ឋលេខាធិការ ឯកឧត្តមអគ្គនាយក លោកអគ្គនាយករង លោកប្រធាន អនុប្រធាននាយកដ្ឋាន លោកអភិបាលរងខេត្ត លោកប្រធានមន្ទីរសាធារណការ និងដឹកជញ្ជូន ខេត្តស្ទឹងត្រែង ខេត្តព្រះវិហារ ខេត្តកំពង់ធំ និងខេត្តកំពង់ឆ្នាំង និងលោក លោកស្រី ជាថ្នាក់ដឹកនាំ និងមន្ត្រីមកពីក្រសួង-ស្ថាប័នពាក់ព័ន្ធជាច្រើនរូប ព្រមទាំងមានការចូលរួមពីតំណាងក្រុមហ៊ុន គ្លូប៊ល ហ្គ្រីន (ខេមបូឌា) អេនើជី ឌីវេឡុបមេន ឯ.ក ផងដែរ។ កិច្ចប្រជុំនាឱកាសនេះ បានប្រព្រឹត្តទៅតាមរបៀបវារៈសំខាន់ៗរួមមាន (១) ការអានសេចក្ដីសម្រេចស្ដីពីការបង្កើតគណៈកម្មការអន្តរក្រសួង ដែលរួមមានសមាសភាពមកពីក្រសួងសាធារណការ និងដឹកជញ្ជូន ក្រសួងសេដ្ឋកិច្ច និងហិរញ្ញវត្ថុ និងក្រសួងរ៉ែ និងឋាមពល រដ្ឋបាលខេត្ត និងមន្ទីរសាធារណការ និងដឹកជញ្ជូន ស្ថិតក្នុងខេត្តស្ទឹងត្រែង ខេត្តព្រះវិហារ ខេត្តកំពង់ធំ និងខេត្តកំពង់ឆ្នាំង, (២) របាយការណ៍សង្ខេបស្ដីពីសាវតា និងការផ្ដល់អាជ្ញាបណ្ណឧស្សាហកម្មអាជីវកម្មធនធានរ៉ែជូនក្រុមហ៊ុន គ្លូប៊ល ហ្គ្រីន (ខេមបូឌា) អេនើជី ឌីវេឡុបមេន ឯ.ក ព្រមទាំងការទទួលខុសត្រូវលើការជួសជុលថែទាំផ្លូវដែលក្រុមហ៊ុនដឹកជញ្ជូនឆ្លងកាត់, (៣) ការធ្វើបទបង្ហាញដោយក្រុមការងារបច្ចេកទេសរបស់ក្រសួងសាធារណការ និងដឹកជញ្ជូន លើលក្ខណៈបច្ចេកទេស វិធីសាស្ត្រក្នុងការជួសជុល និងថែទាំផ្លូវថ្នល់, (៤) ការធ្វើបទបង្ហាញដោយតំណាងក្រុមហ៊ុន គ្លូប៊ល ហ្គ្រីន (ខេមបូឌា) អេនើជី ឌីវេឡុបមេន ឯ.ក ស្ដីពីទំហំការងារដែលបានអនុវត្តការងារជួសជុលថែទាំកំណាត់ផ្លូវដែលក្រុមហ៊ុនបានដឹកជញ្ជូនឆ្លងកាត់កន្លងមក និង (៥) ការងារផ្សេងៗ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube