កំពង់ស្ពឺ៖ អាជ្ញាធរស្រុកគងពិសី និងមន្ទីរជំនាញធនធានទឹក និងឧតុនិយម ខេត្តកំពង់ស្ពឺ បានសម្រេចកាយបើកមុខទឹក ៣កន្លែង ដើម្បីពន្លឿនចរន្តទឹកហូរចេញពីផ្លូវជាតិលេខ៣ ដែលគិតមកទល់ម៉ោងនេះទឹកបានស្រកចុះបន្តិចវិញហើយនៅព្រឹកថ្ងៃទី៦ ខែវិច្ឆិកា ឆ្នាំ២០២៤។ លោក ហន ពិសិដ្ឋ អភិបាលស្រុកគងពិសី បានឱ្យដឹងថា ស្ថានភាពទឹកនៅចំណុចចផ្សារត្រាំខ្នារបានស្រកចុះជាងមួយតឹក ក្រោយមន្ទីរជំនាញបានកាយផ្តាច់ដើម្បីបើកមុខទឹកកាត់តាមបុរីអេសអ័រ រៀលអីស្ទេត(SR) ដែលសង់បិទមុខទឹក។ ចំណុចមួយទៀតស្ថិតនៅក្នុងភូមិអង្គខ្ជាយ ឃុំព្រៃវិហារ អាជ្ញាធរបានសម្រេចកាយបើកមុខទឹកសម្រួលដល់ចរន្តទឹកហូរចេញពីផ្លូវជាតិលេខ៣ ស្ថិតនៅក្បែរផ្សារប៉ាំងសីចំនួន ២កន្លែង ដោយមួយកន្លែងត្រូវកាយផ្តាច់ផ្លូវដើម្បីបង្ហូរទឹកចូលទៅក្នុងប្រឡាយមេ។ ទន្ទឹមនឹងការកាយផ្តាច់ផ្លូវនេះដែរ លោក ហន ពិសិដ្ឋ អភិបាលស្រុកគងពិសី បានបញ្ជាក់ថា ដើម្បីសម្រួលដល់ការធ្វើដំណើរចេញចូលរបស់ប្រជាពលរដ្ឋនៅក្នុងភូមិសាស្ត្រភូមិខ្ជាយនៃឃុំស្នំក្រពើ អាជ្ញាធរស្រុកក៏បានសម្រុកសាងសង់ស្ពានឈើមួយរួចរាល់ទាំងយប់ឱ្យពលរដ្ឋបានឆ្លងកាត់បណ្តោះអាសន្នផងដែរ។ ចំពោះការចរាចរសម្រាប់យានយន្តគ្រប់ប្រភេទនៅរក្សាភាពដើមឱ្យចរាចរលើផ្លូវម្ខាងចំណុចផ្លូវលិចទឹកនៅបិទដដែលមិនឱ្យមានការឆ្លងកាត់ទេ។ លោកអភិបាលស្រុកគងពិសី រំពឹងទុកថា ប្រសិនជាមិនមានភ្លៀងធ្លាក់បន្ថែមនៅផ្នែកខាងលើទៀតទេ នោះស្ថានភាពជំនន់នេះ នឹងមានការថមថយទៅវិញលឿន ពោលគឺ អាចស្រកទៅទាំងស្រុងនៅត្រឹមតែមួយថ្ងៃ ឬពីរថ្ងៃប៉ុណ្ណោះ ហើយរាល់ចរាចរនឹងអាចបើកវិញជាធម្មតា៕