កិច្ចប្រជុំពិនិត្យ និងពិភាក្សាលើសេចក្តីព្រាងច្បាប់ ស្តីពីចរាចរណ៍ផ្លូវគោកថ្មី នាថ្ងៃចន្ទ ទី២១ ខែតុលា ឆ្នាំ២០២៤ លោកជំទាវ មឹន មាណវី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន រួមជាមួយនឹងថ្នាក់ដឹកនាំក្រសួង និងមន្ត្រីជំនាញពាក់ព័ន្ធ ចូលរួមកិច្ចប្រជុំពិនិត្យ និងពិភាក្សាលើសេចក្តីព្រាងច្បាប់ ស្តីពីចរាចរណ៍ផ្លូវគោកថ្មី នៅទីស្តីការគណៈរដ្ឋមន្ត្រី ក្រោមអធិបតីភាព ឯកឧត្ត លី ច័ន្ទតុលា អនុប្រធាន និងជាប្រធានក្រុមទី២ នៃក្រុមប្រឹក្សាអ្នកច្បាប់ និងឯកឧត្តម អ៊ូច ថោងសេង អនុប្រធាន និងជាប្រធានក្រុមការងារទី១ នៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌។ កិច្ចប្រជុំនេះក៏មានការអញ្ជើញចូលរួមពីតំណាងទីស្តីការគណៈរដ្ឋមន្ត្រី តំណាងក្រុមប្រឹក្សាអ្នកច្បាប់ តំណាងក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ តំណាងគណៈកម្មការភាសាវិទ្យាខ្មែរ និងមន្ត្រីជំនាញពាក់ព័ន្ធ សរុបប្រមាណ ៤៥នាក់។ សេចក្តីព្រាងច្បាប់ចរាចរណ៍ផ្លូវគោកថ្មីនេះ ធ្វើឡើងក្នុងគោលបំណងឆ្លើយតបទៅនឹងសន្ទុះនៃការអភិវឌ្ឍន៍សេដ្ឋកិច្ច និងសង្គមឌីជីថលកម្ពុជាមានភាពរីកចម្រើនជាលំដាប់ និងកាន់តែរស់រវើក។ កិច្ចប្រជុំជំនាញបច្ចេកទេសនេះ គឺដើម្បីពិនិត្យ និងពិភាក្សាលើទម្រង់ និងខ្លឹមសារនៃមាត្រានីមួយៗយ៉ាងយកចិត្តទុកដាក់ប្រកបដោយការទទួលការខុសត្រូវខ្ពស់ ដោយសំដៅដល់ការគ្រប់គ្រងសុវត្ថិភាពចរាចរណ៍ផ្លូវគោក ការរក្សាសណ្តាប់ធ្នាប់ចរាចរណ៍ផ្លូវគោក ការទប់ស្កាត់ការប្រព្រឹត្តបទល្មើស ដែលបណ្តាលមកពីការប្រើប្រាស់ផ្លូវថ្នល់ការពារអាយុជីវិតមនុស្ស សត្វ បរិស្ថាន ទ្រព្យសម្បត្តិរដ្ឋ និងឯកជនជាដើម៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube