កិច្ចប្រជុំ Annual Meeting for the ACMECS Coordinating Committees Goal 1 "Seamless Connectively" ទីស្ដីការក្រសួង៖ នាថ្ងៃព្រហស្បតិ៍ ទី១០ ខែតុលា ឆ្នាំ២០២៤ ឯកឧត្ដម ឡេង ធនយុទ្ធា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ ACMECS Coordinating Committees Goal 1 "Seamless Connectively" ដោយមានការចូលរួមពីមន្ត្រីជំនាញ នៃនាយកដ្ឋានសហប្រតិបត្តិការអន្តរជាតិ និងប្រទេសជាសមាជិក ACMECS តាមប្រព័ន្ធវីដេអូពីចម្ងាយ។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យឡើងវិញនូវវឌ្ឍនភាពនៃការអនុវត្តគម្រោងអាទិភាពទាំងឡាយក្នុងផែនការមេអេកម៉ិក ឆ្នាំ២០១៩-២០២៣ និងលទ្ធភាពនៃការលើកសំណើគម្រោងដែលជាគំនិតផ្ដួចផ្ដើមថ្មីៗ ត្រៀមដាក់បញ្ចូលទៅក្នុងផែនការមេអេកម៉ិកថ្មី ឆ្នាំ២០២៤-២០២៨។ ថ្លែងក្នុងឱកាសនៃកិច្ចប្រជុំនេះ ឯកឧត្តមរដ្ឋលេខាធិការ បានថ្លែងអំណរគុណដល់ភាគីឡាវ ដែលបានខិតខំប្រឹងប្រែងរៀបចំឱ្យមានកិច្ចប្រជុំតាមប្រព័ន្ធវីដេអូនេះឡើង បន្ទាប់ពីខកខានជួបប្រជុំមួយរយៈកន្លងមក ដែលនេះសរបញ្ជាក់ឱ្យឃើញពីស្មារតីនៃការពង្រឹងឡើងវិញ និងជំរុញកិច្ចសហប្រតិបត្តិការក្នុងតំបន់អេកម៉ិក តាមរយៈការរៀបចំនូវសកម្មភាព ក៏ដូចជាការលើកនូវគម្រោងទាំងឡាយដែលជាគំនិតផ្ដួចផ្ដើមថ្មីៗ សម្រាប់ត្រៀមដាក់បញ្ចូលទៅក្នុងផែនការមេអេកម៉ិកថ្មី ឆ្នាំ២០២៤-២០២៨ ជាមួយនឹងការរំពឹងទុកថា នឹងត្រូវបានអនុម័តនៅក្នុងកិច្ចប្រជុំកំពូលអេកម៉ិកលើកទី១០ នាពេលខាងមុខ។ សូមជម្រាបជូនថា៖ អេកម៉ិក ជាយុទ្ធសាស្ត្រសហប្រតិបត្តិការសេដ្ឋកិច្ច អាយ៉េយ៉ាវ៉ាឌី-ចៅប្រាយ៉ា-មេគង្គ (Ayeyawady-Chao Phraya-Mekong Economic Cooperation Strategy_ACMECS) ត្រូវបានបង្កើតឡើងនៅឆ្នាំ២០០៣ មានប្រទេសជាសមាជិកចំនួន ប្រាំរួមមាន៖ កម្ពុជា វៀតណាម ឡាវ មីយ៉ាន់ម៉ា និងថៃ មានគោលបំណងតភ្ជាប់គម្លាតសេដ្ឋកិច្ចក្នុង ចំណោមប្រទេសទាំងអស់ជាសមាជិក និងលើកកម្ពស់វិបុលភាពនៅក្នុងអនុតំបន់ប្រកបដោយនិរន្តរភាព។ ក្របខណ្ឌកិច្ចសហប្រតិបត្តិការថ្មីនេះ ត្រូវបានរំពឹងថា នឹងដើរតួជាប្លុកអភិវឌ្ឍន៍ និងជំរុញអាស៊ានឱ្យឆ្ពោះទៅមុខក្នុងល្បឿនកាន់តែលឿនដោយឈរលើមូលដ្ឋានរឹងមាំនិងពឹងផ្អែកលើខ្លួនឯង និងវិបុលភាពរួមគ្នា៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube