ពិភាក្សាជាមួយទីភ្នាក់ងារសហប្រតិបត្តិការអន្តរជាតិជប៉ុន(JICA) ស្តីពីគម្រោងអាទិភាពក្នុងរបៀងសេដ្ឋកិច្ចភាគខាងត្បូងរបស់ប្រទេសកម្ពុជា ទីស្តីការក្រសួង៖នាថ្ងៃចន្ទ ទី៩ ខែកញ្ញា ឆ្នាំ២០២៤ ឯកឧត្តម តូច ចាន់កុសល បានទទួលជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA) ដោយមានចូលរួមពីប្រធាននាយកដ្ឋានថ្នល់ មន្ត្រីបច្ចេកទេស និងជំនាញការ ស្តីពីគម្រោងអាទិភាពក្នុងរបៀងសេដ្ឋកិច្ចភាគខាងត្បូងរបស់ប្រទេសកម្ពុជា។ កិច្ចពិភាក្សានេះបានផ្តោតលើការសិក្សាដើម្បីធ្វើឱ្យប្រសើរឡើងនូវលំហូរចរាចរណ៍លើកំណាត់ជាតិលេខ ១ ការសាងសង់បន្ថែម ការសាងសង់អាកាស ការពង្រីកបន្ថែម និងការគិតគូររៀបចំហេដ្ឋារចនាសម្ព័ន្ធស្ថិតតាមបណ្តោយកំណាត់ជាតិលេខ ១ សម្រាប់ពេលអនាគត។ ភាគីជប៉ុនដែលតំណាងដោយ JICA បានចុះសិក្សា និងប្រមូលព័ត៌មានជាធាតុចូល និងបានលើកឡើងនូវគម្រោងអាទិភាពមួយចំនួនដាក់ជូនក្រសួង ដើម្បីពិនិត្យពិភាក្សា និងសម្រេចយកគម្រោងអាទិភាពដែលសមស្រប ឆ្លើយតបនឹងស្ថានភាពបច្ចុប្បន្ន និងសម្រាប់ពេលខាងមុខ។ ឯកឧត្តមបានសម្តែងនូវការកោតសរសើរចំពោះកិច្ចសហការ និងការជួយជ្រោមជ្រែងរបស់ជប៉ុនមកដល់កម្ពុជាហើយចំពោះគម្រោងអាទិភាពដែល JICA លើកឡើង ក្រសួងនឹងធ្វើការពិនិត្យទៅតាមលក្ខខណ្ឌបច្ចេកទេស ដើម្បីកាត់បន្ថយការប៉ះពាល់ ការរំខានដល់ប្រជាពលរដ្ឋ និងពិភាក្សាជាមួយក្រសួងពាក់ព័ន្ធ ដើម្បីធ្វើការឆ្លើយតបត្រឡប់ទៅវិញ៕ :: ភ្ជាប់ទំនាក់ទំនងជាមួយ (MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube