តាកែវ៖ អភិបាលខេត្តតាកែវ លោក វ៉ី សំណាង បានលើកឡើងថា មិនយូរប៉ុន្មាននោះទេ ផ្លូវមួយខ្សែមានប្រវែង ១០គីឡូម៉ែត្រ ចាប់ពីចំណុច សាលាស្រុក បូរីជលសារ ឆ្ពោះទៅច្រកទ្វារទ្វេភាគីកំពង់ក្រសាំង នឹងអភិវឌ្ឍប្រែក្លាយទៅជាផ្លូវក្រាលកៅស៊ូ ឬចាក់បេតុង នៅថ្ងៃខាងមុខ ព្រោះផ្លូវមួយខ្សែនេះជាសរសៃឈាមចរន្តសេដ្ឋកិច្ច ដ៏មានសារៈសំខាន់បំផុត សម្រាប់បម្រើដល់ផលប្រយោជន៍ប្រជាពលរដ្ឋនៅជាប់ព្រំដែន។ លោកអភិបាលខេត្ត វ៉ី សំណាង មានប្រសាសន៍ដូចនេះ ក្នុងពេលដែលលោកដឹកនាំមន្រ្តីជំនាញ និងអាជ្ញាធរស្រុក ចុះត្រួតពិនិត្យ ទីតាំងផ្លូវខាងលើ។ លោកអភិបាលខេត្ត បានគូសបញ្ជាក់យ៉ាងដូច្នេះថា ក្រោមការយកចិត្តទុកដាក់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា មិនយូរប៉ុន្មាននោះទេ ផ្លូវមួយខ្សែមានប្រវែង ១០គីឡូម៉ែត្រនេះ នឹងអភិវឌ្ឍប្រែក្លាយទៅជាផ្លូវក្រាលកៅស៊ូ ឬចាក់បេតុង នៅថ្ងៃខាងមុខ ព្រោះផ្លូវនេះ គឺជាសសៃឈាមចរន្តសេដ្ឋកិច្ច ដ៏មានសារសំខាន់បំផុតសម្រាប់ប្រទេសជាតិនីមួយៗ ហើយតាមរយៈផ្លូវដ៏សំខាន់មួយខ្សែនេះ នឹងបម្រើផលប្រយោជន៍របស់ប្រជាពលរដ្ឋក្បែរព្រំដែន និងបំពេញតម្រូវការជាក់ស្តែងរបស់ពលរដ្ឋក្នុងការដឹកភោគផល ឬដឹកទំនិញផ្សេងៗ សម្រាប់ប្រកបរបរលក់ដូរប្រចាំថ្ងៃផងដែរ។ លោកអភិបាលខេត្តតាកែវ បានបន្តថា រយៈកាលកន្លងមក ផ្លូវចាប់ពីសាលាស្រុកបូរីជលសារ ឆ្ពោះទៅច្រកទ្វារទ្វេភាគីកំពង់ក្រសាំង គឺប្រជាពលរដ្ឋ ត្រូវធ្វើដំណើរតាមផ្លូវទឹកមែន ប៉ុន្តែចាប់តាំងពីអំឡុងឆ្នាំ២០១៩មក ក្រោមការយកចិត្តទុកដាក់ពីសំណាក់ សម្ដេចតេជោ ហ៊ុន សែន អតីតនាយករដ្ឋមន្រ្តី បានធ្វើការស្ថាបនាផ្លូវមួយខ្សែនេះឡើង ជាចំណងដៃជូនប្រជាពលរដ្ឋរស់នៅតំបន់ជាប់ព្រំដែន មានប្រវែងជាង ១០គីឡូម៉ែត្រ ដែលប្រជាពលរដ្ឋអាចធ្វើដំណើរចាប់ពី សាលាស្រុកបូរីជលសារ ទៅដល់ច្រកទ្វារទ្វេភាគីកំពង់ក្រសាំង ដោយមធ្យោបាយឡាន ម៉ូតូ កង់ គោយន្ត តាមផ្លូវគោកបាន។ ជាមួយគ្នានេះ លោកអភិបាលខេត្ត វ៉ី សំណាង បន្ថែមទៀតថា ប្រជាពលរដ្ឋ ក៏អាចធ្វើដំណើរតាមផ្លូវទឹកក៏បានដូចគ្នាដែរ ដូច្នោះយើងមាន ២ជម្រើសសម្រាប់ប្រជាពលរដ្ឋ ផ្លូវទឹក និងផ្លូវគោក៕