[KBN News] - ចាប់បានរថយន្តធំ១១គ្រឿង ដឹកលើសទម្ងន់ពី៧តោន ទៅ២៥តោន
2018-08-28
ទៅកាន់ទំព័រចុះផ្សាយក្នុង KBN News
ព្រៃវែង ៖ ក្រុមជញ្ជីងចល័តរបស់ក្រសួងសាធារណៈការ និងដឹកជញ្ជូន បានចាប់រថយន្តយីឌុបចំនួន១១គ្រឿង ដើម្បីផាកពិន័យ ដោយសារតែរថយន្តទាំងនោះដឹកលើសទម្ងន់ដែលច្បាប់អនុញ្ញាត ។
សកម្មភាពឆ្មក់ចាប់រថយន្តដឹកលើសទម្ងន់នេះ បានចាប់ធ្វើឡើងរយៈពេល៣ម៉ោង គឺចាប់ពីម៉ោង២រសៀល រហូតដល់ម៉ោង៥ល្ងាច ថ្ងៃទី២៧ សីហា ២០១៨ នៅលើកំណាត់ផ្លូវជាតិលេខ១ ត្រង់ចំណុចភូមិព្រៃខ្លា ឃុំកំពង់សឹង្ហ ស្រុកព្រះស្តេច ខេត្តព្រៃវែង ។
ក្រុមមន្ត្រីជញ្ជីងចល័ត បានប្រាប់ឱ្យដឹងថា ក្នុងរយៈពេល៣ម៉ោងនេះ កម្លាំងជំនាញ ចាប់បានរថយន្តយីឌុបធំៗ បានចំនួន១៤គ្រឿង ក្នុងនោះក្រោយពីថ្លឹងទម្ងន់រួចរកឃើញថា មានរថយន្តដឹកខ្សាច់ និងរថយន្តដឹកថ្មចំនួន១២គ្រឿង បានដឹកលើសទម្ងន់ ចំណែករថយន្ត២គ្រឿងផ្សេងទៀត ពុំបានដឹកលើសទម្ងន់ទេ ហើយមន្ត្រីជំនាញក៏បានអនុញ្ញាតឱ្យបន្តដំណើរទៅមុខ ដោយមិនបានឃាត់ទុក ឬផាកពិន័យអ្វីទេ ។
ដោយឡែករថយន្តដែលដឹកលើសទម្ងន់១២គ្រឿង ក្នុងនោះលើសទាបបំផុត៧តោន និងខ្ពស់បំផុត២៥តោន ត្រូវបានមន្ត្រីជំនាញហៅម្ចាស់រថយន្តឱ្យធ្វើកិច្ចសន្យា និងបង់ផាកពិន័យទៅតាមផ្លូវច្បាប់ ព្រមទាំងកាយទម្លាក់ខ្សាច់ និងថ្មចេញពីរថយន្ត លែងឱ្យលើសទំងន់ ទើបអនុញ្ញាតឱ្យយករថយន្តចេញទៅវិញបាន ។
កន្លងមកធ្លាប់មានលេចឮថា មានមន្ត្រីនៅតាមស្ថានីយថ្លឹងរថយន្តមួយចំនួនបានអនុវត្តការងារមានលក្ខណៈធូររលុង ដែលអាចធ្វើឲ្យមានរថយន្តខ្លះដឹកលើសទម្ងន់បាន ។ បើសិនប្រជាពលរដ្ឋបានឃើញពីភាពអសកម្មណាមួយរបស់មន្ត្រីទាំងនោះអាចរាយការណ៍ទៅកាន់ក្រសួង តាមទូរស័ព្ទ ឬបណ្តាញទំនាក់ទំនងសង្គមរបស់ក្រសួងបាន ដើម្បីចូលរួមកែលម្អលើការងាររបស់មន្ត្រីពាក់ព័ន្ធ ។
ទោះយ៉ាងណា ក្រសួងបានខិតខំក្នុងការទប់ស្កាត់រថយន្តដឹកលើសទម្ងន់ ក្នុងមួយរយៈចុងក្រោយនេះ ។ ការដឹកលើសទម្ងន់នេះ វាជាដំបៅមួយក្លាយជាមហារីកទៅហើយ តាំងពីអតីតកាលមក…មិនមែនធ្វើប៉ុណ្ណឹងអាចចប់នោះទេ…ហើយភ្លាមៗ មិនអាចបញ្ចប់វាបានទេ ៕
