និស្សិតជ័យលាភីអាហារូបករណ៍អ៊ីរ៉ាស្មូស(ERASMUS+) ចំនួន៩រូប ទទួលអនុសាសន៍ផ្តាំផ្ញើល្អៗ មុនចេញដំណើរទៅបន្តការសិក្សាថ្នាក់បរិញ្ញាបត្រជាន់ខ្ពស់ នៅសាធារណរដ្ឋបារាំង ទីស្ដីការក្រសួង៖នារសៀលថ្ងៃទី៣១ ខែកក្កដា ឆ្នាំ២០២៤ ឯកឧត្ដម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្ដម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជួបសំណេះសំណាលដើម្បីផ្តល់អនុសាសន៍ល្អៗជូននិស្សិតជ័យលាភីអាហារូបករណ៍អ៊ីរ៉ាស្មូស(ERASMUS+) ចំនួន៩រូប មុនពេលចេញដំណើរទៅបន្តការសិក្សាថ្នាក់បរិញ្ញាបត្រជាន់ខ្ពស់ នៅសាធារណរដ្ឋបារាំង ដោយមានការចូលរួមពីសំណាក់ថ្នាក់ដឹកនាំ និងមន្ត្រីពាក់ព័ន្ធជាច្រើនរូបផងដែរ។ ជំនួបនេះ ធ្វើឡើងដើម្បីចែករំលែកអំពីបទពិសោធន៍ អនុសាសន៍ និងការអនុវត្តល្អៗ ដែលជាទស្សនទានដ៏មានតម្លៃបំផុតសម្រាប់និស្សិតយកទៅផ្សព្វផ្សាយវប្បធម៌ អរិយធម៌ និងការអភិវឌ្ឍរបស់ជាតិ ក្នុងគោលបំណងឱ្យពិភពលោកបានដឹងបានយល់អំពីប្រទេសកម្ពុជាកាន់តែច្បាស់។ ថ្លែងក្នុងឱកាសនោះ ឯកឧត្តមរដ្ឋលេខាធិការ បានលើកឡើងផងដែរអំពីសមិទ្ធផលសម្រេចបានសំខាន់ៗទាក់ទងនឹងការអភិវឌ្ឍហេដ្ឋារចនាសម្ព័ន្ធរូបវន្ត ក្រោមម្លប់សន្តិភាព និងការដឹកនាំដ៏ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា ដែលបាននាំប្រទេសជាតិយើងឆ្លងកាត់មហាវិនាសកម្ម ដោយសារសង្គ្រាម និងអភិវឌ្ឍឈានឡើងលើគ្រប់វិស័យ។ ជាមួយគ្នានោះដែរ ឯកឧត្តមរដ្ឋលេខាធិការ បានផ្តាំផ្ញើឱ្យក្មួយៗនិស្សិតជ័យលាភីទាំងអស់ខិតខំប្រឹងប្រែងរៀនសូត្រ និងទទួលបទពិសោធន៍ ចំណេះដឹងល្អៗ ដើម្បីយកមកអភិវឌ្ឍប្រទេសជាតិឱ្យបានរីកចម្រើនថែមទៀត និងបានរំលឹកដល់និស្សិតទាំងអស់ត្រូវថែរក្សាសុខភាព មិត្តភាព សាមគ្គីភាព និងទំនាក់ទំនងល្អ ដោយប្រកាន់ភ្ជាប់នូវវិន័យ សីលធម៍ សុជីវធម៌ និងគោរពច្បាប់ឱ្យបានខ្ជាប់ខ្ជួនផងដែរ។ សូមជម្រាបជូនផងដែរថា៖ និស្សិតអាហារូបករណ៍ចំនួន៩រូប ដែលនឹងត្រូវបន្ដការសិក្សាថ្នាក់បរិញ្ញាបត្រជាន់ខ្ពស់នៅប្រទេសបារាំងរួមមាន៖ សិក្សាលើមុខជំនាញវិស្វកម្ម សំណងស៊ីវិល គ្រឿងបង្គុំ និងរូបធាតុ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube