សិក្ខាសាលាផ្សព្វផ្សាយស្ដីពី សារៈប្រយោជន៍នៃការចុះបញ្ជីវិស្វករនៅគណៈវិស្វករកម្ពុជា ទីស្ដីការក្រសួង៖ នាព្រឹកថ្ងៃសុក្រ ទី២៦ ខែកក្កដា ឆ្នាំ២០២៤ ឯកឧត្ដម សុខុម ភគវន្តមុនី រដ្ឋលេខាធិការក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍ក្រុមប្រឹក្សាគណៈវិស្វករកម្ពុជា តំណាងដ៍ខ្ពង់ខ្ពស់ឯកឧត្ដម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីភាពបើកវគ្គសិក្ខាសាលាផ្សព្វផ្សាយស្ដីពីសារៈប្រយោជន៍នៃការចុះបញ្ជីវិស្វករនៅគណៈវិស្វករកម្ពុជា ដោយមានការអញ្ជើញចូលរួមពីថ្នាក់ដឹកនាំក្រសួង អគ្គលេខាធិការ អគ្គលេខាធិការរង សមាជិក សមាជិកា នៃអគ្គលេខាធិការដ្ឋានគណៈវិស្វករកម្ពុជា ប្រធានមន្ទីរ មន្ត្រីរាជការ សិស្ស-និស្សិត ក្រុមហ៊ុនជាតិ និងអន្តរជាតិ។ សិក្ខាសាលានេះរៀបចំឡើងក្នុងគោលបំណង ដើម្បីអប់រំបណ្តុះបណ្តាលបង្កើនសមត្ថភាពបច្ចេកទេស គ្រប់មុខជំនាញវិជ្ជាជីវៈវិស្វកម្មឱ្យមានគុណភាព ប្រសិទ្ធភាព សុវត្ថិភាព ស្ថិរភាព ប្រកបដោយការទទួលខុសត្រូវខ្ពស់ ដែលធ្វើឱ្យវិជ្ជាជីវៈវិស្វកម្មកាន់តែល្អ ដើម្បីការពារកិត្តិយស សេចក្តីថ្លៃថ្នូរដល់វិស្វករ និងរួមចំណែកថែរក្សាលើកស្ទួយដល់អត្តសញ្ញាណជាតិ និងសហការរៀបចំកម្មវិធីអប់រំវិស្វកម្មឱ្យមានកម្រិតស្តង់ដារមួយដែលអាចទទួលយកបាននៅគ្រឹះស្ថានបណ្ដុះបណ្ដាលវិស្វកម្មនៅទូទាំងប្រទេសកម្ពុជា។ ថ្លែងទៅកាន់អង្គសិក្ខាសាលា ឯកឧត្ដមរដ្ឋលេខាធិការ សម្ដែងការអបអរសាទរនូវលទ្ធផលដ៏ត្រចះត្រចង់របស់វិស្វករជាតិយើង ដែលបានរួមចំណែកជាមួយរាជរដ្ឋាភិបាលបង្កើតឡើងនូវគណៈវិស្វករកម្ពុជាដ៏មានសារៈសំខាន់មួយនេះ ដើម្បីធានាបាននូវការអភិវឌ្ឍន៍ដោយចីរភាពក្នុងបរិបទកម្ពុជា រាជរដ្ឋាភិបាលក្រោមការដឹកនាំដ៏ឈ្លាសវៃ និងទទួលខុសត្រូវខ្ពស់របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តីនៃព្រះរាជាណាចក្រកម្ពុជា និងជាប្រធានកិត្តិយសគណៈវិស្វករកម្ពុជាបានអនុវត្តជាជំហានៗ និងដោយជោគជ័យ។ ដោយឡែកការអភិវឌ្ឍន៍ជាតិ និងសមាហរណកម្មសេវាវិស្វកម្មតាមស្មារតីនៃកិច្ចព្រមព្រៀងទទួលស្គាល់គ្នាទៅវិញទៅមកលើសេវាវិស្វកម្មក្នុងតំបន់អាស៊ាន ដែលប្រព្រឹត្តទៅដោយរលូន និងទទួលបានជោគជ័យនោះ ចាំបាច់ត្រូវមានមូលដ្ឋានគតិយុត្ត និងធនធានបញ្ញវន្តវិស្វករជាតិប្រកបដោយគុណភាពស្តង់ដារមួយដែលអាចទទួលយកបាន ដូច្នេះហើយបានជាគណៈវិស្វករកម្ពុជាតម្រូវឱ្យមានការចុះបញ្ជីវិស្វករនៅគណៈវិស្វករកម្ពុជា។ ទន្ទឹមនឹងនេះ ឯកឧត្ដមរដ្ឋលេខាធិការ បានកោតសរសើរ វាយតម្លៃខ្ពស់ ដែលនេះជាកាលានុវត្តភាពមួយដ៏សមស្របដែលប្រជាពលរដ្ឋកម្ពុជា ពិសេសបញ្ញវន្តជាវិស្វកម្មជាតិ កំពុងបំរើការងារពាក់ព័ន្ធទាំងស្ថាប័នរដ្ឋ និងឯកជន បន្តសហការគ្នាជំរុញឱ្យដំណើរការចុះបញ្ជីវិស្វករនៅគណៈវិស្វករកម្ពុជា ប្រព្រឹត្តិទៅដោយភាពរលូន និងល្អប្រសើរដើម្បីរួមចំណែកលើកកម្ពស់សេដ្ឋកិច្ចសង្គមក្នុងចរន្តពាណិជ្ជកម្មសម័យថ្មីនេះផងដែរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube