ចុះផ្សព្វផ្សាយយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៩ និងកម្មវិធីមិត្តអប់រំមិត្ត ស្តីពីមេរោគអេដស៍ និងជំងឺអេដស៍ ដល់ជនបង្គោលចំនួន៦ស្ថានីយ កាលពីថ្ងៃទី១៣-១៤ ខែមិថុនា ឆ្នាំ២០២៤ ដោយទទួលបាននូវអនុសាសន៍ណែនាំដ៏ខ្ពង់ខ្ពស់ពី ឯកឧត្តម ប៉េង ពោធិ៍នា រដ្ឋមន្ត្រី ក្រសួងសាធារណការ និងដឹកជញ្ជូន និងឯកឧត្តម សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសកម្រិតកំណត់ បានអនុញ្ញាតឱ្យ ឯកឧត្តម សេន ស៊ីហ៊ត់ រដ្ឋលេខាធិការ ទទួលបន្ទុកការងារអប់រំអេដស៍ និងគ្រឿងញៀន អមដំណើរដោយ ឯកឧត្តម គឹម សាន់ អនុរដ្ឋលេខាធិការ និងឯកឧត្តម ប៉ាតទ្រី ប៉ាស្តាន អនុរដ្ឋលេខាធិការ ចុះអប់រំកម្មវិធីមិត្តអប់រំមិត្ត ស្តីពីមេរោគអេដស៍ និងជំងឺអេដស៍ និងផ្សព្វផ្សាយយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៩ ដើម្បីឆ្លើយតបតាមរយៈវិស័យសាធារណការនិងដឹកជញ្ជូន ដល់ជនបង្គោលចំនួន៦ស្ថានីយជញ្ជីងអចល័ត រួមមានស្ថានីយលង្វែក ស្ថានីយឃ្លាំងមឿង ស្ថានីយពុកឆ្មារ ស្ថានីយកូនដំរី ស្ថានីយពោធិ៍ថ្មី និងស្ថានីយអង្គស្នួល។ ការចុះផ្សព្វផ្សាយនេះធ្វើឡើងក្នុងគោលបំណងឱ្យមន្ត្រីរាជការ បុគ្គលិក កម្មករ អ្នកបើកបរថយន្ត អ្នកធ្វើដំណើរ ជាពិសេសបងប្អូនប្រជាពលរដ្ឋមានការយល់ដឹង ក្នុងការចូលរួមកែប្រែអាកប្បកិរិយាប្រកបដោយសីលធម៌ ក្នុងការប្រព្រឹត្តដែលទាក់ទងនឹងសកម្មភាពរួមភេទដោយសុវត្ថិភាព និងមានការប្រុងប្រយ័ត្នខ្ពស់ យល់ដឹងច្បាស់ពីគុណប្រយោជន៍នៃការប្រើប្រាស់ស្រោមអនាម័យ និងបំណិនជីវិតតាមមធ្យោបាយរៀងៗខ្លួន និងបង្កើតឱ្យមានការយល់ដឹងឱ្យបានទូលំទូលាយអំពីសិទ្ធិជាមូលដ្ឋានរបស់អ្នកផ្ទុកមេរោគអេដស៍ ត្រូវចូលរួមលុបបំបាត់ការរើសអើងគ្រប់ប្រភេទ ដើម្បីជំរុញការអនុវត្តគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ ឱ្យមានប្រសិទ្ធិភាពខ្ពស់។ ឯកឧត្តមរដ្ឋលេខាធិការ បានបញ្ជ្រាបបន្ថែមក្នុងការដោះស្រាយរួមគ្នាអំពីផលប៉ះពាល់នៃការប្រើប្រាស់គ្រឿងញៀន ដែលនាំឱ្យខូចសុខភាព បង្កបញ្ហាដល់ក្រុមគ្រួសារ សង្គម និងបានលើកទឹកចិត្តដល់អ្នកញៀនគ្រឿងញៀនឱ្យស្ម័គ្រចិត្តទៅទទួលយកការបន្សាប ឈានដល់ការផ្តាច់ការប្រើប្រាស់គ្រឿងញៀនទាំងស្រុង សូមឱ្យយុវជនយើងត្រូវនិយាយថា “ ទេ ” ដាច់ខាតចំពោះគ្រឿងញៀន!។ នៅទីបញ្ចប់ ឯកឧត្តម បានស្នើសុំឱ្យជនបង្គោលទាំងអស់ទាញយក និងប្រើប្រាស់កម្មវិធីទូរស័ព្ទ ដៃ NoDrug ដើម្បីទទួលនូវសារអប់រំ ព័ត៌មានទាន់ហេតុការណ៍ ចំណេះដឹងពីផលប៉ះពាល់ និងវិនាសកម្មនៃគ្រឿងញៀន ព័ត៌មានពាក់ព័ន្ធនឹងការផ្តល់សេវាព្យាបាល និងស្តារនីតិសម្បទាអ្នកញៀនគ្រឿងញៀន និងជាពិសេសអាចជាមធ្យោបាយក្នុងការរាយការណ៍អំពីករណីប្រើប្រាស់ ការជួញដូរ ការដឹកជញ្ជូន និងការកែច្នៃផលិតគ្រឿងញៀនក្នុងសហគមន៍ មកកាន់ក្រុមទទួលព័ត៌មាន ដើម្បីឱ្យអាជ្ញាធរសមត្ថកិច្ចមានវិធានការជាក់ស្តែង ដែលឈានទៅបង្ក្រាបទាន់ពេលវេលា៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube