មន្រ្តីជាន់ខ្ពស់ក្រុមហ៊ុនអភិវឌ្ឍព្រលានយន្តហោះអន្តរជាតិតេជោតាខ្មៅបានគូសបញ្ជាក់ថា ក្រុមហ៊ុនបានត្រៀមបម្រុងដីសម្រាប់គម្រោងសាងសង់ផ្លូវរថភ្លើង តភ្ជាប់ពីព្រលានយន្តហោះតេជោតាខ្មៅមករាជធានីភ្នំពេញ។ សូមចុច Subscribe Channel Telegram កម្ពុជាថ្មីដើម្បីទទួលបានព័ត៌មានថ្មីៗទាន់ចិត្ត លោក ឆារស៍ វ៉ាន់ អភិបាលក្រុមហ៊ុន Cambodia Airport Investment (CAIC) លោក ឆារស៍ វ៉ាន់ អភិបាលក្រុមហ៊ុន Cambodia Airport Investment (CAIC) និងជាអភិបាលក្រុមហ៊ុនកាណាឌីយ៉ាគ្រុប ដែលអភិវឌ្ឍព្រលានយន្តហោះតេជោតាខ្មៅប្រាប់ថា ខណៈដែលដំណើរការសាងសង់ព្រលានយន្តហោះតេជោតាខ្មៅសម្រេចបានជាង ៧០ ភាគរយ ក្រុមហ៊ុនបានដាក់ផែនការជាច្រើនដើម្បីគាំទ្រដល់ការអភិវឌ្ឍព្រលានយន្តហោះតេជោតាខ្មៅ។ ក្នុងនោះក្រុមហ៊ុនបានបម្រុងដីសម្រាប់គម្រោងសាងសង់ផ្លូវរថភ្លើង តភ្ជាប់ពីព្រលានយន្តហោះតេជោតាខ្មៅមករាជធានីភ្នំពេញ។ «តាមផ្លូវ ៦០ ម៉ែត្រ ដែលសាងសង់ចេញពីព្រលាន យើងបានត្រៀមបម្រុងទីតាំងដីសម្រាប់ថ្ងៃអនាគតអភិវឌ្ឍមានជាផ្លូវរថភ្លើង»។ នេះបើតាមលោក ឆារស៍ វ៉ាន់។ លោក ឆារស៍ វ៉ាន់ បន្ថែមថា «ដោយសារគម្រោងស្ថិតនៅក្នុងការសិក្សា ហើយដំណើរការនឹងចាប់ផ្តើមនៅពេលណាអាស្រ័យលើរដ្ឋាភិបាល»។ យ៉ាងណាមិញ បើតាមលោក ឆារស៍ វ៉ាន់ ដំណើរការសាងសង់អាចចាប់ផ្តើម ក្រោយពេលដែលព្រលានយន្តហោះតេជោតាខ្មៅបានបញ្ចប់ និងដាក់ឲ្យដំណើរការពេញលេញ។ កាលពីពេលថ្មីៗនេះ ក្រុមហ៊ុនជំនាញផ្លូវដែករបស់ចិនចំនួនពីរ បានទទួលភ្លើងខៀវពីរាជរដ្ឋាភិបាលកម្ពុជាឱ្យសិក្សាលើគម្រោងសាងសង់ផ្លូវរថភ្លើងក្រោមដីក្នុងរាជធានីភ្នំពេញ និងរថភ្លើងធុនស្រាលតភ្ជាប់រវាងរាជធានីភ្នំពេញ និងព្រលានយន្តហោះអន្តរជាតិតេជោតាខ្មៅ។ បន្ទាប់ពីទទួលបានភ្លើងខៀវពីរាជរដ្ឋាភិបាលកម្ពុជា ថ្នាក់ដឹកនាំក្រុមហ៊ុនឆាយណាមេត្រូ និងហ្គ័ងចូវមេត្រូ បានធ្វើដំណើរមកដល់ប្រទេសកម្ពុជា ដើម្បីជួបជាមួយស្ថាប័នពាក់ព័ន្ធឈានទៅសិក្សាគម្រោង។ ក្រោមការដឹកនាំពីលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី ១ ក្រុមប្រឹក្សាអភិវឌ្ឍន៍កម្ពុជា គណៈប្រតិភូក្រុមហ៊ុនអភិវឌ្ឍផ្លូវដែករបស់ចិន បានចូលរួមកិច្ចប្រជុំជាមួយក្រសួងស្ថាប័នពាក់ព័ន្ធរបស់កម្ពុជា។ កិច្ចប្រជុំនេះ ក៏មានការចូលរួមពីលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន លោក គង់ សោភ័ណ អភិបាលខេត្តកណ្តាល លោក នួន ផារ័ត្ន អភិបាលរងរាជធានីភ្នំពេញ ព្រមទាំងមន្ត្រីមកពីក្រសួងសេដ្ឋកិច្ច និងហិរញ្ញវត្ថុ និងតំណាងក្រុមហ៊ុន OCIC របស់អ្នកឧកញ៉ា ពុង ខៀវសែ ដែលជាម្ចាស់គម្រោងអភិវឌ្ឍព្រលានយន្តហោះតេជោតាខ្មៅ។ លោក ស៊ុន ចាន់ថុល បានគូសរំលេចថា ការរៀបចំប្រព័ន្ធដឹកជញ្ជូនក្នុងរាជធានីភ្នំពេញឱ្យបានល្អប្រសើរ គឺជាកិច្ចការដ៏សំខាន់ ហើយត្រូវបានយកចិត្តទុកដាក់ខ្ពស់ពីរាជរដ្ឋាភិបាល។ ផ្លូវរថភ្លើងក្រោមដីក្នុងរាជធានីភ្នំពេញ និងរថភ្លើងធុនស្រាលតភ្ជាប់រវាងរាជធានីភ្នំពេញ និងព្រលានយន្តហោះអន្តរជាតិតេជោ មានសារៈសំខាន់ខ្លាំងណាស់សម្រាប់សម្រួលការធ្វើដំណើរគ្រាដែលការចរាចរណ៍ក្នុងរាជធានីភ្នំពេញកាន់តែកកស្ទះ។ បន្ថែមពីនេះ ការធ្វើផ្លូវរថភ្លើងក្រោមដីក្នុងរាជធានីភ្នំពេញ និងរថភ្លើងធុនស្រាលភ្ជាប់រវាងភ្នំពេញ និងព្រលានយន្តហោះអន្តរជាតិតេជោ បានជួយដល់សេដ្ឋកិច្ចកម្ពុជា និងផ្នែកបរិស្ថានថែមទៀតផង។ ជាមួយគ្នានេះ លោកឧបនាយករដ្ឋមន្ត្រី ស៊ុន ចាន់ថុល ក៏បានណែនាំក្រុមហ៊ុនអភិវឌ្ឍផ្លូវដែករបស់ចិនពន្លឿនការសិក្សាឱ្យបានលឿន ដើម្បីដាក់ជូនរាជរដ្ឋាភិបាលពិនិត្យ។ នៅព្រឹកមិញនេះ មានដំណើរទស្សនកិច្ចពីតំណាងក្រុមហ៊ុនអាកាសចរណ៍ជាតិនិងអន្តរជាតិ ព្រមទាំងក្រុមហ៊ុនផ្តល់សេវាគាំទ្រការដឹកជញ្ជូនតាមផ្លូវអាកាសជាង ១០០ នាក់ ដើម្បីសិក្សាស្វែងយល់ពីដំណើរការវិវឌ្ឍជុំវិញការសាងសង់ព្រលានយន្តហោះអន្តរជាតិតេជោក្រុងតាខ្មៅ។ លោក វ៉ាន់ ចន្ទី អគ្គនាយកគោលនយោបាយ និងដឹកជញ្ជូនផ្លូវអាកាស នៃរដ្ឋលេខាធិការរដ្ឋានអាកាសចរស៊ីវិល មានប្រសាសន៍ថា ដំណើរទស្សនកិច្ចនេះដើម្បីផ្តល់ព័ត៌មានពីការវិវឌ្ឍន៍ចុងក្រោយ នៃដំណើរការសាងសង់ព្រលានយន្តហោះតេជោតាខ្មៅ និងឱ្យក្រុមហ៊ុនពាក់ព័ន្ធត្រៀមខ្លួនជាមុនក្នុងការផ្ដល់សេវាអាកាសចរ នៅពេលព្រលានយន្តហោះដាក់ឱ្យដំណើរការនៅពេលដ៍ខ្លីខាងមុខ។ បើតាមមន្រ្តីព្រលានយន្តហោះតេជោតាខ្មៅ គិតត្រឹមថ្ងៃទី ០៦ ខែមិថុនា ឆ្នាំ ២០២៤ ដំណើរការសាងសង់អាកាសយានដ្ឋានអន្តរជាតិតេជោ (TIA) សម្រេចសាងសង់បានជាង ៧៥% និងចំណាយថវិកាអស់ជាង ១ ១០០ លានដុល្លារអាមេរិក៕