កិច្ចប្រជុំជាមួយស្ថាប័នភាពជាដៃគូសម្រាប់ហេដ្ឋារចនាសម្ព័ន្ធ (P4I) ដើម្បីទទួលបានព័ត៌មានត្រឡប់ពាក់ព័ន្ធនឹងបទពិសោធន៍ និងកង្វះខាតនៅអំឡុងពេលបដិសណ្ឋារកិច្ចទស្សនកិច្ចសិក្សាអំពីវិស័យទឹកស្អាត និងអនាម័យ នៅប្រទេសអូស្ត្រាលី ទីស្តីការក្រសួង ៖ នាថ្ងៃពុធ ទី៣ ខែមិថុនា ឆ្នាំ២០២៤ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួង ចូលរួមកិច្ចប្រជុំជាមួយស្ថាប័នភាពជាដៃគូសម្រាប់ហេដ្ឋារចនាសម្ព័ន្ធ (Partnerships for Infrastructure-P4I) នៃប្រទេសអូស្រ្ដាលី តាមរយៈវីដេអូពីចម្ងាយ ដោយមានការចូលរួមពី ឯកឧត្តមអនុរដ្ឋលេខាធិការ លោកអគ្គនាយករង លោកប្រធាននាយកដ្ឋាន និងមន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ តំណាងមន្ទីរសាធារណការ និងដឹកជញ្ជូនខេត្តសៀមរាប ព្រមទាំងតំណាងស្ថាប័ន (P4I) នៃប្រទេសអូស្ត្រាលី ផងដែរ។ កិច្ចប្រជុំនេះរៀបចំឡើងដើម្បីទទួលបានព័ត៌មានត្រឡប់មកវិញពាក់ព័ន្ធនឹងបទពិសោធន៍ និងកង្វះខាតនៅអំឡុងពេលបដិសណ្ឋារកិច្ចទស្សនកិច្ចសិក្សា អំពីវិស័យទឹកស្អាត និងអនាម័យ និងសន្និសីទអន្តរជាតិប្រចាំឆ្នាំ Ozwater'24 នៅប្រទេសអូស្ត្រាលី ដែលបានប្រព្រឹត្តទៅ ចាប់ពីថ្ងៃ២៨ ខែមេសា ឆ្នាំ២០២៤ រហូតដល់ ថ្ងៃទី៨ ខែឧសភា ឆ្នាំ២០២៤ និងការជ្រើសរើសជំនាញដែលជាអាទិភាពរបស់អគ្គនាយកដ្ឋានប្រព័ន្ធចម្រោះទឹកកខ្វក់ សម្រាប់ការចូលរួមទស្សនកិច្ចសិក្សានាពេលខាងមុខបន្តទៀត។ លើសពីនេះទៅទៀត នាពេលដ៏ខ្លីខាងមុខនេះ ស្ថាប័ន Partnership for Infrastructure(P4I) នឹងមានការអញ្ជើញមន្ត្រីជំនាញរបស់ក្រសួង ដើម្បីចូលរួមកម្មវិធី on the job training ដែលមានរយៈពេល ៣សប្តាហ៍ រឺ១ខែ ធ្វើយ៉ាងណាឱ្យសិក្ខាកាមដែលនឹងត្រូវអញ្ជើញចូលរួម ទទួលបាននូវបទពិសោធន៍ក្នុងការចូលរួមបំពេញការងារជំនាញ ដែលជាអាទិភាពរបស់អគ្គនាយកដ្ឋានប្រព័ន្ធចម្រោះទឹកកខ្វក់ នៅប្រទេសអូស្ត្រាលី ដោយផ្ទាល់តែម្តង៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube