ពិធីសំណេះសំណាលជាមួយមន្រ្តីរាជការ បុគ្គលិក កម្មករនិយោជិត កំពង់ផែស្វយ័តក្រុងព្រះសីហនុ អបអរសាទរខួបលើកទី១៣៨ នៃទិវាពលកម្មអន្តរជាតិ ១ ឧសភា ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី នាយករដ្ឋមន្ត្រី ព្រះសីហនុ៖ នាព្រឹកថ្ងៃពុធ ទី០១ ខែឧសភា ឆ្នាំ២០២៤ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញចូលរួមអមដំណើរ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងពិធីសំណេះសំណាលជាមួយមន្រ្តីរាជការ បុគ្គលិក កម្មករនិយោជិត កំពង់ផែស្វយ័តក្រុងព្រះសីហនុ នាឱកាសអបអរសាទរខួបអនុស្សាវរីយ៍លើកទី១៣៨ នៃទិវាពលកម្មអន្តរជាតិ ១ ឧសភា ក្រោមប្រធានបទ «សហគ្រាសមួយជាសហគមន៍សុខសាន្តមួយ» ដោយមានការអញ្ជើញចូលរួមពី ឯកឧត្តម អ៊ូអីណុ អាត់ស៊ូស៊ី (H.E Mr. UENO Atsushi) ឯកអគ្គរាជទូតវិសាមញ្ញនិងពេញសមត្ថភាពនៃប្រទេសជប៉ុន ប្រចាំព្រះរាជាណាចក្រកម្ពុជា តំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA) ក្រសួង-ស្ថាប័នពាក់ព័ន្ធ អាជ្ញាធរខេត្តព្រះសីហនុ ក្រុមប្រឹក្សាភិបាលខេត្ត ភ្ញៀវកិត្ដិយសជាតិ-អន្ដរជាតិ និងបងប្អូនមន្រ្តីរាជការ និយោជិត កម្មករ កម្មការិនីជាច្រើនរូប។ ថ្លែងក្នុងឱកាសនេះ ឯកឧត្តមរដ្ឋមន្ត្រី បានជម្រាបដល់អង្គពិធីអំពីសាវតាររបស់កំពង់ផែស្វយ័តក្រុងព្រះសីហនុ រួមជាមួយនឹងដំណើរការប្រតិបត្តិការ និងគម្រោងអភិវឌ្ឍន៍សមត្ថភាពបន្ថែមរបស់កំពង់ផែ ក៏ដូចជាការអភិវឌ្ឍ និងការពង្រីកសមត្ថភាពរបស់ខ្លួនជាបន្តបន្ទាប់ តាមរយៈការសាងសង់ហេដ្ឋារចនាសម្ព័ន្ធកំពង់ផែ រួមមាន៖ ការសាងសង់ផែកុងតឺន័រ ជម្រៅទឹក១១,៥ម៉ែត្រ ការសាងសង់ចំណតផែពហុបំណង ជម្រៅទឹក១៣,៥ម៉ែត្រ ការសាងសង់ចំណតមូលដ្ឋានផ្គត់ផ្គង់ភស្តុភារសម្រាប់ការរុករកប្រេង ការបំពាក់ឧបករណ៍និងមធ្យោបាយលើកដាក់កុងតឺន័រ ការសាងសង់ទីលានស្តុកកុងតឺន័រ ឃ្លាំងទំនិញ ចំណតរថយន្តដឹកកុងតឺន័រ ចំណតផែច្រាំងទំនិញទូទៅ ការសាងសង់តំបន់សេដ្ឋកិច្ចពិសេស ជាពិសេស គម្រោងសាងសង់ចំណតផែកុងតឺន័រទឹកជ្រៅថ្មី-ជំហានទី១ ដែលបានប្រារព្ធពិធីបើកការដ្ឋានកាលពីថ្ងៃទី២២ ខែធ្នូ ឆ្នាំ២០២៣ កន្លងទៅ ក្រោមអធិបតីភាពដ៏ខ្ពង់ខ្ពស់របស់ សម្តេចធិបតី។ ជាមួយគ្នានេះ ឯកឧត្តមរដ្ឋមន្ត្រី បានលើកឡើងថា ការអភិវឌ្ឍវិស័យ កំពង់ផែ ក៏ត្រូវបានកំណត់យ៉ាងច្បាស់នៅក្នុងយុទ្ធសាស្ត្របញ្ចកោណនេះផងដែរ គឺនៅត្រង់ ចំណុចទី៣ នៃមុំទី២ ក្នុងបញ្ចកោណទី២ ដែលកំណត់អំពី “ការបន្តបង្កើនថវិកាវិនិយោគ និងកៀរគរហិរញ្ញប្បទាន ព្រមទាំងការពង្រឹងប្រសិទ្ធភាពនៃការប្រើប្រាស់ ដើម្បីបន្តអភិវឌ្ឍហេដ្ឋារចនាសម្ព័ន្ធកំពង់ផែ ដែលត្រូវបានចាត់ទុកជាហេដ្ឋារចនាសម្ព័ន្ធរូបវន្តគន្លឹះមួយ ក្នុងចំណោម ហេដ្ឋារចនាសម្ព័ន្ធរូបវន្តដទៃទៀត ដូចជា ផ្លូវគោក ផ្លូវដែក ផ្លូវទឹក និងផ្លូវអាកាស”។ ឯកឧត្តមរដ្ឋមន្ត្រី បានបញ្ជាក់ថា ដើម្បីចូលរួមសម្រេចឱ្យបានតាមចក្ខុវិស័យ មាគ៌ានយោបាយ និងយុទ្ធសាស្ត្របញ្ចកោណ របស់រាជរដ្ឋាភិបាលអាណត្តិទី៧នេះ ក្រសួងសាធារណការ និងដឹកជញ្ជូនក៏បានដាក់ចេញនូវផែនការអាទិភាពក្នុងការពង្រឹង និងលើកកម្ពស់ការអភិវឌ្ឍវិស័យហេដ្ឋារចនាសម្ព័ន្ធសំខាន់ៗ និង វិស័យកំពង់ផែនៅកម្ពុជា រួមទាំងការធ្វើកំណែទម្រង់ ដើម្បីកាត់បន្ថយតម្លៃឡូជីស្ទីក បង្កើនភាពប្រកួតប្រជែង និងផ្តល់សេវាប្រកបដោយមានភាពឆាប់រហ័ស តម្លាភាព និងប្រសិទ្ធភាព។ ឆ្លៀតក្នុងឱកាសនេះ ឯកឧត្តមរដ្ឋមន្រ្តី ក៏ដូចជាក្រសួងសាធារណការ និងដឹកជញ្ជូនទាំងមូល បានសម្តែងការគាំទ្រដល់រាជរដ្ឋាភិបាល ក្នុងការអនុវត្តគម្រោង ព្រែកជីកហ្វូណន តេជោ ឲ្យសម្រេចទៅបាន។ ក្នុងឱកាសនៃការប្រារព្ធខួបលើកទី១៣៨ នៃទិវាពលកម្មអន្តរជាតិ សម្តេចធិបតីបានសម្តែងការចូលរួមអបអរសាទរដោយក្តីសោមនស្សរីករាយ ជាមួយបងប្អូន កម្មករនិយោជិត នៅទូទាំងប្រទេស ជាពិសេសជាមួយថ្នាក់ដឹកនាំ មន្ត្រីរាជការ បុគ្គលិក កម្មករនិយោជិតទាំងអស់ នៃកំពង់ផែស្វយ័តក្រុងព្រះសីហនុ។ សម្តេចធិបតី បានគូសបញ្ជាក់ថា៖ រាជរដ្ឋាភិបាលអាណត្តិថ្មីនេះ នៅតែបន្តប្ដេជ្ញាយកចិត្តទុកដាក់ខ្ពស់ចំពោះបងប្អូនមន្ត្រីរាជការ បុគ្គលិក កម្មករនិយោជិតនៅទីនេះផ្ទាល់បើនិយាយដោយឡែក និងបើនិយាយជារួមចំពោះបងប្អូនបុគ្គលិក កម្មករ-កម្មការិនី និយោជិតទាំងអស់ ដែលបម្រើការងារនៅតាមបណ្ដាសហគ្រាស គ្រឹះស្ថាន និងរោងចក្រនៅទូទាំងប្រទេសផងដែរ។ មុននឹងបញ្ចប់ សម្តេចធិបតី បានថ្លែងអំណរគុណដល់ថ្នាក់ដឹកនាំក្រសួងសាធារណការ និងដឹកជញ្ជូន ជាពិសេសក្រុមប្រឹក្សាភិបាល ថ្នាក់ដឹកនាំ និងបងប្អូនមន្ត្រីរាជការ បុគ្គលិក កម្មករនិយោជិតនៃកំពង់ផែស្វយ័តក្រុងព្រះសីហនុទាំងអស់ ដែលបានសហការគ្នាយ៉ាងជិតស្និទ្ធរួមចំណែកពង្រឹងការអនុវត្តច្បាប់ និងលិខិតបទដ្ឋានគតិយុត្តជាតិ និងអន្តរជាតិពាក់ព័ន្ធនឹងវិស័យការងារ ដើម្បីធានាបាននូវប្រសិទ្ធភាព និងស្ថិរភាពអាជីវកម្មរបស់កំពង់ផែស្វយ័តក្រុងព្រះសីហនុធ្វើឱ្យចំណូលកើនឡើងជាលំដាប់រៀងរាល់ឆ្នាំ ដែលជាការរួមចំណែកយ៉ាងសំខាន់ដល់ការអភិវឌ្ឍ និងកំណើនសេដ្ឋកិច្ចជាតិ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.YouTube