កិច្ចប្រជុំពិនិត្យវឌ្ឍនភាពគម្រោងសាងសង់ ស្ដារ និងលើកកម្រិតគុណភាពផ្លូវជាតិលេខ៣៣ និងពិភាក្សាលើសំណើរបស់បងប្អូនប្រជាពលរដ្ឋដែលបានលើកស្នើមកក្រសួងនាពេលកន្លងមក ទីស្តីការក្រសួង៖ ថ្ងៃទី២៦ ខែមេសា ឆ្នាំ២០២៤ ឯកឧត្តម ប៊ុន សុផាត អនុប្រធានគម្រោង និងជាតំណាងដ៏ខ្ពង់ខ្ពស់ឯកឧត្តម ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគ្រប់គ្រងសម្របសម្រួលគម្រោង បានអញ្ជើញដឹកនាំកិច្ចប្រជុំពិនិត្យវឌ្ឍនភាពគម្រោងសាងសង់ ស្ដារ និងលើកកម្រិតគុណភាពផ្លូវជាតិលេខ៣៣ និងពិភាក្សាលើសំណើរបស់បងប្អូនប្រជាពលរដ្ឋដែលបានលើកស្នើមកក្រសួងនាពេលកន្លងមក។ កិច្ចប្រជុំនេះមានការចូលរួម ពីមន្ត្រីជំនាញនៃអង្គភាពពាក់ព័ន្ធគម្រោង និងក្រុមការងារបច្ចេកទេសរបស់ក្រុមហ៊ុនសាជីវកម្មស្ពាន និងថ្នល់ចិន (CRBC) និងតំណាងក្រុមហ៊ុនទីប្រឹក្សាបច្ចេកទេសក្វាងចូវ វ៉ាងអាន ផងដែរ។ កិច្ចប្រជុំនេះធ្វើឡើងក្នុងគោលបំណងពិនិត្យមើលវឌ្ឍនភាពការងារសាងសង់ ឱ្យសមស្របតាមផែនការគ្រោងទុក និងពិភាក្សាលើសំណើរបស់បងប្អូនប្រជាពលរដ្ឋដែលរស់នៅតាមបណ្តោយផ្លូវជាតិមួយខ្សែនេះ រាប់ចាប់ពីទីរួមខេត្តកំពត ដល់ច្រកលក(ព្រំដែនកម្ពុជា-វៀតណាម) បានលើកស្នើមកក្រសួងនាពេលកន្លងមក។ ក្នុងនោះគឺតម្រូវឱ្យក្រុមហ៊ុនសាងសង់រៀបចំមានផ្លូវថ្មើរជើងធ្វើដំណើរលើចំណុចមួយចំនួន និងការស្នើកាយជាប្រឡាយអមសងខាងផ្លូវនៅតាមទីប្រជុំជនមួយចំនួន និងការរៀបចំនូវផ្លាក គំនូសសញ្ញាសម្គាល់ចរាចរណ៍នៅតាមដងផ្លូវឱ្យបានត្រឹមត្រូវតាមលក្ខណៈបទដ្ឋានបច្ចេកទេស ដើម្បីសុវត្ថិភាពអ្នកធ្វើដំណើរ ព្រមទាំងមានគុណភាពអាចប្រើប្រាស់បានយូរអង្វែង៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube