កិច្ចប្រជុំដំបូងស្តីពីការស្ទង់មតិប្រមូលទិន្នន័យផ្លូវ និងស្ពាន នៅច្រករបៀងសេដ្ឋកិច្ចភាគខាងត្បូង ទីស្តីការក្រសួង៖ នាថ្ងៃពុធ ទី០៣ ខែមេសា ឆ្នាំ២០២៤ ឯកឧត្តម តូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំដំបូងស្តីពីការស្ទង់មតិប្រមូលទិន្នន័យផ្លូវ និងស្ពាន នៅច្រករបៀងសេដ្ឋកិច្ចភាគខាងត្បូង ដោយមានការចូលរួមពីថ្នាក់ដឹកនាំក្រសួង តំណាងអង្គការ JICA តំណាងក្រសួងសេដ្ឋកិច្ច និងហិរញ្ញវត្ថុ តំណាងរដ្ឋបាលរាជធានីភ្នំពេញ តំណាងរដ្ឋបាលខេត្តកណ្តាល និងមន្ត្រីជំនាញពាក់ព័ន្ធមួយចំនួនផងដែរ។ កិច្ចប្រជុំនេះ ត្រូវបានរៀបចំឡើងក្នុងគោលបំណងដើម្បីប្រមូល និងវិភាគទិន្នន័យសម្រាប់ការកែលម្អផ្លូវជាតិលេខ១ និងការសាងសង់ស្ពានឆ្លងកាត់ទន្លេមេគង្គថ្មី ដើម្បីកាត់បន្ថយការកកស្ទះ សម្រួលការធ្វើដំណើររបស់ប្រជាពលរដ្ឋ ជំរុញកំណើនសេដ្ឋកិច្ច និងបង្កើតការតភ្ជាប់បណ្តាញផ្លូវថ្នល់ឱ្យកាន់តែមានប្រសិទ្ធភាព និងសម្បូរបែប។ ឯកឧត្តមរដ្ឋលេខាធិការ បានស្នើសុំកិច្ចសហការគ្នាយ៉ាងជិតស្និទ្ធរវាងអាជ្ញាធរ និងភាគីពាក់ព័ន្ធទាំងអស់ ដើម្បីឱ្យដំណើរការសិក្សានេះប្រព្រឹត្តទៅដោយរលូន ព្រមទាំងថ្លែងអំណរគុណចំពោះរដ្ឋាភិបាលជប៉ុន និងអង្គការ JICA ដែលបានបន្តខិតខំប្រឹងប្រែងជួយដល់កម្ពុជាក្នុងការអភិវឌ្ឍហេដ្ឋារចនាសម្ព័ន្ធក្នុងប្រទេស៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube